تاۋەلسىزدىكتىڭ 30 جىلى ىشىندە 1 ميلليون قانداس اتامەكەنگە ورالدى - ساناي زاڭعار
«ازاتتىقتىڭ ارقاسىندا التايدان - اتىراۋعا دەيىنگى بايتاق دالانىڭ شەكاراسى بەلگىلەنىپ، قازىعى قاعىلدى. سان عاسىردىڭ تۇيتكىلى بولعان قىتاي مەن قازاقستان، رەسەي، وزبەكستان، قىرعىزستان، تۇركىمەنستان سىندى مەملەكەتتەر اراسىنداعى شەكارا ماسەلەسى شەشىلگەندە، الەمدىك قاۋىمداستىق تاڭدانىسىن جاسىرا المادى. راسىندا، كەيبىر مەملەكەتتەر عاسىرلار بويى شەكارا ماسەلەسىن شەشە الماي كەلەدى. ال ءسىز، سايىن دالانىڭ شەتكى شەبىن ساناۋلى ۋاقىتتا شەگەندەپ بەردىڭىز. ەرەن ەڭبەگىڭىزگە كەمەلدى كەلەشەك ۇرپاق ءوزىنىڭ تاريحي باعاسىن بەرەدى دەپ بىلەم»، - دەدى ول ەلباسىنا قاراتا.
سونىمەن قاتار ول ق ر تۇڭعىش پرەزيدەنتى نەگىزىن قالاعان «نۇرلى كوش» باعدارلاماسىمەن ەلدىكتىڭ ەلەۋلى 30 جىلىندا ءبىر ميلليوننان استام ادام اتامەكەنىنە ورالعانان ايتتى.
«البەتتە ءار قانداس «ەلىم ماعان نە بەرەدى دەپ ەمەس، مەن ەلىمە نە بەرەم دەگەن» كەمەل ويمەن كەلدى. ونىڭ دالەلى توبىل وڭىرىنە تۇراقتاعان ءبىزدىڭ اۋلەت. اتا- اناممەن باۋىرلارىم اتا كاسىپپەن اينالىسىپ، جاعدايىن جاقسارتىپ، تىرشىلىگىن تۇزەپ وتىر»، - دەدى ول.
سونىمەن قاتار ول اتامەكەنگە ات باسىن تىرەگەن اعايىن ەلدىڭ الەۋمەتتىك- ەكونوميكالىق الەۋەتىن ارتتىرۋ جولىندا ايانباي ەڭبەك ەتىپ جاتقانىن، وركەنيەت كوشىنە ىلەسكەن ورەلى ەلدىڭ تۇرمىس- تىرشىلىگىنە بەيىمدەلىپ، ءتۇرلى ۇلىس وكىلدەرىمەن ءتىل تابىسىپ، بىتە قايناسقانىن اتاپ ءوتتى.
«سوڭعى جىلدارى قانداس تالاپكەرلەرگە بولىنەتىن كۆوتا ەسەلەپ ۇلعايدى. سونىڭ ارقاسىندا 7 مىڭنان استام قانداس باۋىر قازىر ەلىمىزدە ءبىلىم الىپ ءجۇر. ءتىپتى ا ق ش، كانادادا تۇراتىن قازاق جاستارى ايگىلى گارۆارد، كەمبريدج ەمەس، ورتالىق ازياداعى وزىق وقۋ ورىنى - نازاربايەۆ ۋنيۆەرسيتەتىنە ءتۇسىپ جاتىر»، - دەدى ول.
