3 مىڭ ەرىكتى COVID-19 ىندەتىنە قارسى ازىرلەنگەن وتاندىق ۆاكتسينانى سىناماق
بۇل تۋرالى ق ر ءبىلىم جانە عىلىم مينيسترلىگى عىلىم كوميتەتى بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتىنىڭ باس ديرەكتورى كۇنسۇلۋ زاكاريا ءمالىم ەتتى، دەپ حابارلايدى قازاقپارات ءتىلشىسى.
«قازىرگى مالىمەتتەر بويىنشا COVID-19 ىندەتىنە قارسى ازىرلەنگەن وتاندىق ۆاكتسينا (QazCovid-in) شەتەلدىك ماماندار ازىرلەگەن ۆاكتسينادان كەم تۇسپەيدى. الداعى 29-قاراشادا كلينيكالىق زەرتتەۋدىڭ 2-كەزەڭى اياقتالادى. زەرتتەۋ 200 ەرىكتى ادامعا جۇرگىزىلىپ جاتىر. جەلتوقسان ايىندا ەلىمىز بويىنشا تاعى 3 مىڭ ەرىكتىگە كلينيكالىق زەرتتەۋ جۇرگىزۋدى جوسپارلاپ وتىرمىز. ودان بولەك، ەلىمىزدە كوروناۆيرۋس ىندەتىنە قارسى تاعى دا باسقا ۆاكتسينا ازىرلەۋ جاريالاندى. ءبىراق وعان ءبىزدىڭ قاتىسىمىز جوق. بىزدەگى مالىمەتتەر بويىنشا ول ۆاكتسينا شەتەلدىك مامانداردىڭ قاتىسۋىمەن ازىرلەنۋدە. سوندىقتاندا ونى 100 پايىز وتاندىق ۆاكتسينا دەۋ قيىنعا سوعادى»، - دەدى ك. زاكاريا ق ر ءبىلىم جانە عىلىم مينيسترلىگى عىلىمي كوميتەتىنىڭ «GYLYM TALKS» اتتى ونلاين جوباسىندا.
