بيىل قاڭتار- قاراشادا ەكونوميكا ءوسىمى 3,9 پايىزدى قۇرادى - سۇلەيمەنوۆ

بۇل تۋرالى ۇكىمەت وتىرىسىندا ق ر ۇلتتىق ەكونوميكا ءمينيسترى تيمۋر سۇلەيمەنوۆ ءمالىم ەتتى،

دەپ حابارلايدى قازاقپارات.

«اعىمداعى جىلعى قاڭتار- قاراشادا ينۆەستيتسيالىق بەلسەندىلىكتىڭ جىلدامداۋى جانە ينفلياتسيالىق پروتسەستەردىڭ تۇراقتانۋى، سونداي- اق بارلىق 6 بازالىق سالا بويىنشا جاعدايدىڭ جاقسارۋىنىڭ اياسىندا ەكونوميكانىڭ ءوسۋى 3,9 پايىزدى قۇرادى. نەگىزگى كاپيتالعا سالىنعان ينۆەستيتسيالاردىڭ ءوسۋ قارقىنى 2016 -جىلمەن سالىستىرعاندا 2,8 ەسەگە كوتەرىلىپ، 5,7 پايىزعا ءوستى. جىل باسىنان بەرى جىلدىق ينفلياتسيانىڭ دەڭگەيى بەكىتىلگەن ارالىقتا، ياعني 6-8 پايىز دالىزىندە بولدى جانە قاراشانىڭ قورىتىندىسى بويىنشا 7,3 پايىزدى قۇرادى.

ەكونوميكانى ءارتاراپتاندىرۋ، اۋىر ونەركاسىپتىك كەشەندى، كاسىپكەرلىكتى جانە ينفراقۇرىلىمدى دامىتۋ، سونداي- اق جۇمىسپەن قامتۋدى قامتاماسىز ەتۋ بويىنشا باعدارلامالاردى ىسكە اسىرۋدىڭ ناتيجەسىندە ەكونوميكانىڭ بارلىق سالالارىندا وڭ سەرپىن بايقالىپ وتىر»، - دەپ اتاپ ءوتتى مينيستر.

ونىڭ سوزىنە قاراعاندا، ناقتى سەكتوردا 6 بازالىق سالانىڭ ىشىندە ەڭ جوعارى ءوسۋ ونەركاسىپتە 7,3 پايىز دەڭگەيىندە، كولىكتە - 4,8 پايىز جانە بايلانىستا 3,2 پايىز كورسەتكىشىندە بايقالعان.

«اۋىل شارۋاشىلىعىندا ءوسۋ بيىلعى قاڭتار- قىركۇيەكتەگى 1,9 پايىزدان 11 ايدىڭ قورىتىندىلارى بويىنشا 2,3 پايىزدى كورسەتتى. قۇرىلىس سالاسىنىڭ 2016 -جىلعى جوعارى ءوسۋىنىڭ اياسىندا اعىمداعى جىلدىڭ باسىنان بەرى اركەلكى ءوسۋ بايقالىپ وتىر، ول بيىلعى قاڭتار- قاراشادا 0,3 پايىزدى قۇرادى. ەكونوميكانىڭ ناقتى سەكتورىنداعى ىسكەرلىك بەلسەندىلىك ساباقتاس سالالار ءۇشىن سۇرانىس قۇرا وتىرىپ قىزمەت كورسەتۋ سالاسىنىڭ ءوسۋىن ىنتالاندىردى»، - دەپ ءتۇسىندىردى تيمۋر سۇلەيمەنوۆ.

اۆتور: رۋسلان عابباسوۆ 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى