قازاقستان ەكونوميكاسىنا 3,5 ميلليارد دوللار ينۆەستيتسيا قۇيىلادى
بۇل تۋرالى فورۋمنان تىس ب ا ق وكىلدەرىنە سۇحبات بەرگەن ق ر ينۆەستيتسيالار جانە دامۋ ءمينيسترى جەڭىس قاسىمبەك ايتتى، دەپ حابارلايدى قازاقپارات.
«بۇگىن ءبىز سوماسى 3,5 ميلليارد ا ق ش دوللارىن قۇرايتىن ءتۇرلى 12-13 كەلىسىمگە، كەلىسىمشارتتارعا قول قويۋدى جوسپارلاپ وتىرمىز. ولار ءتۇرلى سالانى، اتاپ ايتقاندا تاۋ-كەن مەتاللۋرگيا كەشەنىن، اۋىل شارۋاشىلىعىن، كولىك پەن لوگيستيكانى جانە باسقا دا سالالاردى قامتيدى. بۇل فورۋمعا جۇزدەن استام ءىرى ترانس ۇلتتىق كومپانيالار، امەريكالىق، ەۋروپالىق جانە ازيالىق ينۆەستورلار قاتىسادى. سونداي-اق اگروونەركاسىپ كەشەنى بويىنشا 800 ميلليون دوللارعا ەسەپتەلگەن كەلىسىمشارتىنا قول قويىلماق»، - دەدى ول.
سونىمەن قاتار، مينيستر بۇگىنگى فورۋم بارىسىندا ءبىرقاتار قىتايلىق جوبالار دا قارالىپ، راسىمدەلەتىندىگىن اتاپ ءوتتى.
«2017-جىلدىڭ ءبىرىنشى جارتىجىلدىعىندا 10 ميلليارد دوللار ينۆەستيتسيا تارتىلدى. جىلدىڭ سوڭىنا دەيىن وسى ترەندتى ساقتاپ قالۋدى جوسپارلاپ وتىرمىز. ال كەلەسى جىلى مىندەتتى تۇردە ەسەلەي تۇسەتىن بولامىز. بىزدە «ءبىر تەرەزە» قاعيداتىمەن اينالىساتىن ءىرى «Kazakh Invest» ينۆەستيتسيالىق كومپانياسى قۇرىلدى. جاڭا تەتىكتەر پايدا بولىپ، جاڭا زاڭناما قابىلدادىق. اتاپ ايتقاندا، ءبىز جاڭا سالىق كودەكسكە سايكەس جۇمىس جاسايمىز. جەر قويناۋى جانە جەر قويناۋىن پايدالانۋ تۋرالى كودەكس قابىلداناتىن بولادى. اتالعان كودەكستە تاۋ- كەن مەتاللۋرگيا سالاسىن بارىنشا ىرىقتاندىرۋ جۇرگىزىلىپ جاتىر. ياعني، ءبىز ءدال وسى سالاعا ينۆەستيتسيا قۇيىلۋىن كۇتەمىز. ءبىز اعىمداعى جىلى ينۆەستيتسيا ءوسىمى 8 دەن 10 پايىزعا دەيىن بولادى دەپ كۇتىپ وتىرمىز. كەلەسى جىلى دا وسى ترەندتى ساقتاعىمىز كەلەدى»، - دەدى جەڭىس قاسىمبەك.
