قازاقستاندا اۆتوموبيل قۇراستىرۋ 3,5 ەسەگە ۇلعايدى
بۇل جايىندا قازاقستان اۆتوموبيل سالاسى كاسىپورىندارى وداعىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.
«2017 -جىلدىڭ قاڭتار- ءساۋىر ايلارىندا قازاقستان اۋماعىندا جالپى قۇنى 28,9 ميلليارد تەڭگەنى قۇرايتىن 5050 اۆتوكولىك قۇرالىن (جۇك كولىكتەرى مەن اۆتوبۋستاردى قوسا العاندا) شىعاردى. ناقتى ماندە شىعارىلىم كولەمى وتكەن جىلعى كورسەتكىشتەن 3,5 ەسەگە اسىپ ءتۇستى. جەڭىل اۆتوموبيلدەر شىعارۋ كورسەتكىشى 5,4 ەسەگە ارتىپ، 4571 بىرلىككە جەتتى» ، - دەلىنگەن «قازاۆتوونەركاسىپ» حابارلاماسىندا.
اعىمداعى جىلدىڭ قاڭتار- ءساۋىر ايلارىنىڭ قورىتىندىسى بويىنشا، 54 اۆتوبۋس شىعارىلىپ، وسىدان ءبىر جىل بۇرىنعى كورسەتكىشتەن 2 ەسە ارتقان. ال جۇك كولىكتەرىن شىعارۋ كولەمى 36 پايىزعا قىسقارىپ، 264 بىرلىكتى قۇراعان.
بۇعان قوسا، تاراتىلعان اقپاراتتا وتاندىق اۆتوزاۋىتتار جىل باسىنان بەرى 3859 كولىكتى ساتقاندىعى ايتىلىپ وتىر. بۇل دا وتكەن جىلعى كورسەتكىشتەن 37,2 پايىزعا كوپ. «قازاۆتوونەركاسىپ» كاسىپورىندارىنىڭ نارىقتاعى ۇلەسى 32,5 پروتسەنتكە جەتىپ وتىر. ال وسىدان ءبىر جىل بۇرىنعى ۇلەسى 18,8 پروتسەنت بولعان ەدى.
جەرگىلىكتى قۇراستىرىلعان اۆتوموبيلدەردىڭ ىشىندە «ازيا اۆتو» ا ق شىعارعان كولىكتەر باسىم. بۇل كومپانياعا جىل باسىنان بەرى ساتىلعان كولىكتەردىڭ 73 پروتسەنتى نەمەسە 2820 سى تيەسىلى.
ال «سارىارقااۆتوونەركاسىپ» جشس بولسا اعىمداعى جىلى 622 كولىك ساتىپ ۇلگەردى. ولاردىڭ وتاندىق نارىقتاعى ۇلەسى 17 پايىزعا تەڭ.
2017 -جىلدىڭ 4-ايىنىڭ قورىتىندىسى بويىنشا، قازاقستاندا قۇراستىرىلعان جەڭىل كولىكتەردىڭ ىشىندەگى بارىنشا تانىمالدىققا يە بەستىكتىڭ قاتارىندا Lada (1897 بىرلىك) ، KIA (600 بىرلىك) ، Hyundai (345 بىرلىك) ، Chevrolet (264 بىرلىك) جانە JAC (174 بىرلىك) كولىكتەرى بار.
اعىمداعى جىلدىڭ 4 ايىنىڭ قورىتىندىسىندا سالا كاسىپورىندارىنىڭ رەسپۋبليكانىڭ ىشكى جالپى ءونىمى قۇرىلىمىنا قوسقان ۇلەسى 28,9 ميلليارد تەڭگەگە جەتتى. بۇل وسىدان ءبىر جىل بۇرىنعى كورسەتكىشتەن 15,1 پروتسەنتكە كوپ. 2017 -جىلدىڭ قاڭتار- ناۋرىزىنىڭ قورىتىندىسىندا نەگىزگى كاپيتالعا سالىنعان سالا كاسىپورىندارىنىڭ ينۆەستيتسياسى 2,8 ميلليارد تەڭدەگەن اسىپ جىعىلدى.
اۋدارما: مارلان جيەمباي
