جىلقى ەتىن مۇلدەم جەمەيتىن ەلدەردە جىلقى ەتى بىزدىكىنەن 3-4 ەسە ارزان- تولەۋتاي راقىمبەكوۆ
تولەۋتاي راقىمبەكوۆ قازاقپارات اگەنتتىگىنىڭ قازاقستانعا ارگەنتينا، بولگاريا، يسلانديا، مەكسيكا، موڭعوليا جانە ۋرۋگۆايدان جىلقى ەتى يمپورتتالاتىنى تۋرالى اقپاراتىن وقىعان جانە سوعان قاتىستى حالىقتىڭ جازعان سىني پىكىرلەرىنە تاڭعالعان.
«نەگە ۇيات، ماسقارا بولۋى كەرەك؟ كاسىپكەرلەر 1,7 مىڭ توننا ەت اكەلگەن ەكەن، بۇل شامامەن 7 مىڭ باس مال. وندا تۇرعان نە بار؟ ءبىزدىڭ ەلىمىزدە 2 ميلليوننان استام جىلقى مالى بار. 1991 -جىلدان بەرى جىلقى مالىن كوبەيتۋمەن اينالىسىپ كەلەمىز»، - دەپ جازدى تولەۋتاي راقىمبەكوۆ Facebook-تەگى ءوز پاراقشاسىنا.
«جىلقى ەتىن يمپورتتاۋ - كاسىپكەرلەردىڭ ماركەتينگتىك ءتاسىلى. بىزگە ەت ەكسپورتتاعان ەلدەردە ادامدار جىلقى ەتىن مۇلدەم جەمەيدى، سوندىقتان دا ولاردا جىلقى ەتى بىزدىكىنەن 3-4 ەسە ارزان. نەگە اقشا تاپپاسقا؟ ەكىنشىدەن، سىرتتان جىلقى ەتىن تەك وڭدەۋگە عانا اكەلەدى»، - دەيدى ساراپشى.
راقىمبەكوۆتىڭ پىكىرىنشە، جىلقى ەتىن اسىپ جەۋدى ۇناتاتىن قازاقتار جانە جالپى قازاقستاندىقتار يمپورتتىق جىلقى ەتىن جەمەيدى.
«بىزدەگى جىلقى ەتى مەن يمپورتتىق ەتتىڭ، ءتىپتى بىزگە جاقىن موڭعوليالىق ەتتىڭ ءدامى جەر مەن كوكتەي. ءبىر تاجىريبەلى مامان موڭعوليادان ەت يمپورتتايمىن دەپ شىعىنعا ۇشىراي جازداعان. قازاقستاندىقتار موڭعوليالىق جىلقى ەتىن ساتىپ المايدى. ال وزىمىزدەگى جىلقى ەتى دەليكاتەسكە اينالدى، ءبىر جىلقىنىڭ ءوزى 350-380 مىڭ تەڭگەگە ساتىلادى»، - دەپ ءتۇسىندىردى تولەۋتاي راقىمبەكوۆ.
وسىمدىك مايىن يمپورتتاۋدا دا ءدال وسىنداي جاعداي ورىن الىپ وتىر.
«بىرىنشىدەن، پالما مايى بىزدەگى كۇنباعىس مايىنان ەكى ەسەگە ارزان. ەكىنشىدەن، بىزدە ەكزوتيكالىق ماي تۇرلەرىنە، ماسەلەن ءزايتۇن مايىنا قىزىعاتىندار بار. بىزدە ءزايتۇن وسپەيدى، بانان دا، اپەلسين دە وسپەيدى! نە ىستەۋ كەرەك؟ يمپورتتايمىز. ايتسە دە، كۇنباعىس مايىن ءوندىرۋ بويىنشا ءوزىمىزدى- ءوزىمىز قامتاماسىز ەتىپ وتىرمىز. ءتىپتى ەۋروپاعا جارتى ميلليون توننا ماي ەكسپورتتادىق»، - دەپ اتاپ ءوتتى ول.
«سوندىقتان، بازبىرەۋلەر ويلاعانداي اۋىل شارۋاشىلىعىنداعى جاعدايىمىز ناشار ەمەس. ارينە، ماسەلەلەر جەتىپ ارتىلادى. ءبىراق، جەگلوۆ ايتقانداي: «ماسەلەنىڭ بولۋى قورقىنىشتى ەمەس، سول ماسەلە شەشىلمەي جاتسا، سودان قورقۋ كەرەك». شامامەن وسىلاي»، - دەپ تۇيىندەدى تولەۋتاي راقىمبەكوۆ.
اۆتور: ايجان سەرىكجان قىزى
