تۇركيادا كەشە قايتالانعان جەر سىلكىنىسىنەن 3 ادام قازا تاۋىپ، 300-گە جۋىق ادام جاراقات العان

بۇل جايىندا ەلدىڭ دەنساۋلىق ساقتاۋ ءمينيسترى فاحرەتتين قوجا ءمالىم ەتتى.

«بۇگىن كەشكە حاتايدا بولعان ەكى جەر سىلكىنىسىنەن 294 ادام جاراقات الدى. وكىنىشكە قاراي، ونىڭ ىشىندە 18 ناۋقاستىڭ جاعدايى اۋىر. العاشقى مەديتسينالىق كومەك كورسەتىلگەننەن كەيىن ولار ادانا جانە دەرتيول قالالارىنا جەتكىزىلدى. ءبىزدىڭ بارلىق دالالىق اۋرۋحانالار پاتسيەنتتەرىمىزگە ءتيىستى قىزمەت كورسەتۋدى جالعاستىرىپ جاتىر»، - دەپ جازدى مينيستر Twitter پاراقشاسىندا.

ونىڭ ايتۋىنشا، حاتاي ۋنيۆەرسيتەتىنىڭ مەديتسينا فاكۋلتەتىندە جانە يسكەندەرۋن مەن رەيحانلى مەملەكەتتىك اۋرۋحانالارىندا جاتقان جالپى سانى 95 پاتسيەنت ەكى جاڭا جەر سىلكىنىسىنەن كەيىن ساقتىق شاراسى رەتىندە ادانا مەن دەرتيول اۋرۋحانالارىنا اۋىستىرىلعان.

«ءبىزدىڭ دالالىق اۋرۋحانالار حاتايدا كەزەكشىلىك ەتەدى»، - دەيدى ول.

جاڭادان بولعان جەر سىلكىنىسى سالدارىنان 3 ادام قازا تاپقان.

تۇركيانىڭ حاتاي قالاسىنا قاراستى دەفنە اۋدانىندا جەر سىلكىنىسى ەكى رەت قايتالانعان سوڭ انتاكيا مەن يسكەندەرۋن قالالارىنىڭ اراسىنداعى جول بۇزىلدى.

تۇركيا ۆيتسە- پرەزيدەنتى فۋات وكتاي دەفنە اۋدانىندا بولعان 6,4 بالدىق جەر سىلكىنىسىنەن سوڭ 20 تەربەلىس تىركەلگەنىن ايتتى.

AFAD اگەنتتىگىنىڭ حابارلاۋىنشا، حاتاي پروۆينتسياسىندا بۇگىن بولعان ءزىلزالادان سوڭ حابارلانعان تەڭىز دەڭگەيىنىڭ كوتەرىلۋى تۋرالى ەسكەرتۋدىڭ كۇشى جويىلدى.

وسىعان دەيىن دۇيسەنبى كۇنى حاتاي پروۆينتسياسىنىڭ دەفنە اۋدانىندا 6,4 ماگنيتۋدالىق جەر سىلكىنىسى تىركەلگەنى حابارلاندى.

كەشىرەك 5,8 ماگنيتۋدالىق تاعى ءبىر جەر سىلكىنىسى بولدى. تۇركيانىڭ وڭتۇستىك- شىعىسىندا ۇيلەر قيرادى. جەراستى ءدۇمپۋى سيريا، ليۆان، كيپر، يزرايل، يوردانيا، يراك پەن پالەستينادا سەزىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى