قىتايدا 3 جاسىندا جوعالعان قىزدى اتا-اناسى 24 جىلدان كەيىن تاپتى
ۆان مين تسين وسى جىلداردىڭ ىشىندە ىزدەۋىن توقتاتپادى. بۇل ءۇشىن ءتىپتى تاكسي جۇرگىزۋشى بولىپ جۇمىسقا ورنالاستى. ول ايتەۋىر ءبىر كۇنى قىزىنىڭ نەمەسە ونى تانيتىن جولاۋشىنىڭ كولىككە وتىراتىندىعىنا سەنىمىن جوعالتپادى دەپ حابارلايدى bbc.com.
مين تسين جىلدار بويى قىزىنىڭ جوعالعاندىعى تۋرالى حابارلاندىرۋ تاراتىپ كەلدى. ۆان مين تسين مەن ايەلى ليۋ دەن ين ول كەزدە جەمىس-جيدەك ساتۋمەن اينالىسقان. بىردە كەشكىلىك اقشاسىن ۇساتپاق بولىپ كورشى دۇكەنگە باس سۇققان ۆان مين تسين قايتىپ كەلگەن كەزدە قىزىن تاپپاي قالادى.
2015-جىلى ۆان ىزدەۋ گەوگرافياسىن كەڭەيتىپ، Didi Chuxing كومپانياسىنا تاكسي جۇرگىزۋشى بولىپ ورنالاستى.
ول ارتقى ورىندىققا كوپ جىلدان بەرى قىزىن ىزدەپ جۇرگەندىگىن جازىپ قويعان. ۆاندا تسي فەننىڭ سۋرەتى جوق ەدى، سوندىقتان وعان قاتتى ۇقسايتىن كىشى قىزىنىڭ فوتوگرافياسىن ىلگەن. ال ۆاننىڭ جولاۋشىلارى اكەسى بىرنەشە جىلدان بەرى قىزىن ىزدەپ جۇرگەندىگىن الەۋمەتتىك جەلىلەرگە جاريالاي باستادى.
پوليتسيا دا قاراپ قالمادى. وعان ۇقساس جانداردىڭ د ن ق- سى سايكەس كەلمەي جاتتى.
مىنە قىزىق، وتكەن جىلدىڭ سوڭىندا ىزدەۋ جۇمىستارىندا ءۇمىت وتى جاندى. پوليتسيادا ەڭبەك ەتەتىن سۋرەتشى ۆاننىڭ ەسەيگەن شاعىنا سايكەس كەلەتىندەي ەتىپ پورترەتىن سالدى. ول ينتەرنەت ارقىلى تاراتىلدى.
ۆاننىڭ وتباسىنان مىڭداعان شاقىرىم قاشىقتىقتا، قىتايدىڭ سولتۇستىگىندە تىرشىلىك كەشىپ جاتقان 27 جاسار كان ين بىردە بۇل پورترەتتى كورىپ ونداعى ايەلدىڭ وزىنە اۋماي قالعاندىعىنا تاڭ قالعان.
د ن ق- ساراپتاما جاساۋعا شەشىم قابىلدانعان. ونىڭ ناتيجەسى كوڭىلدەگىدەي بولىپ شىقتى. ۆان ءوزىنىڭ جوعالعان قىزىن تاۋىپ، 3- ساۋىردە گيرين پروۆينتسياسىندا تۇراتىن كان ين ءوزىنىڭ كۇيەۋىمەن جانە ۇل- قىزدارىمەن چەندۋعا ۇشىپ كەلدى.
قىتايلىق ب ا ق- تاردىڭ جازۋىنشا، كان ءيندى كىشكەنتاي كەزىندە چەندۋدان نەبارى 20 شاقىرىم قاشىقتىقتا ورنالاسقان كورشىلەس قالاداعى ەرلى-زايىپتىلار اسىراپ العان. ولار ءبۇلدىرشىندى چەندۋعا باراتىن جولدىڭ جاعاسىنان تاۋىپ العان ەكەن.
