قازاقستانىڭ جالپى حالىقارالىق رەزەرۆتەرى جىل باسىنان بەرى 3,2 پايىزعا ءوسىپ، 94,3 ميلليارد ا ق ش دوللارىن قۇرادى - د. اقىشەۆ
بۇل تۋرالى بۇگىن الماتىدا وتكەن ارنايى باسپا ءسوز ءماسليحاتى بارىسىندا ق ر ۇلتتىق بانكىنىڭ ءتوراعاسى دانيار اقىشەۆ ءمالىم ەتتى.
«التىن- ۆاليۋتا قورى بويىنشا، 2016-جىلدىڭ مامىر ايىنىڭ سوڭىنداعى جاعداي بويىنشا ق ر ۇلتتىق بانكىنىڭ جالپى حالىقارالىق رەزەرۆتەرى - 28,8 ميلليارد ا ق ش دوللارىن قۇرادى. جىل باسىنان بەرگى ءوسىم - 3,2 پايىز بولدى. قازاقستاننىڭ حالىقارالىق رەزەرۆتەرىنىڭ قۇرامىنا ۇلتتىق بانكتىڭ رەزەرۆتەرى مەن ۇلتتىق قوردىڭ اكتيۆتەرى ەنەتىندىگى بەلگىلى. مامىر ايىنىڭ سوڭىنداعى جاعداي بويىنشا، ۇلتتىق قوردىڭ اكتيۆتەرىنىڭ كولەمى - 65, 5 ميلليارد ا ق ش دوللارىن قۇرادى. وسىلايشا، قازاقستاننىڭ جالپى رەزەرۆتەرى - 94,3 ميلليارد ا ق ش دوللارىن قۇرادى. جىل باسىنان بەرگى ءوسىم - 3,2 پايىزدى قۇراپ وتىر»، - دەدى د. اقىشەۆ.
سونىمەن قاتار، ول قازاقستاننىڭ سىرتقى قارىزىنىڭ كوبەيىپ جاتقاندىعى جايلى الىپ-قاشپا اڭگىمەلەرگە قاتىستى ءوز جاۋابىن بەردى.
«سوڭعى كەزدەرى جەكەلەگەن باسپا ءسوز بەتتەرىندە قازاقستاننىڭ سىرتقى قارىزى بويىنشا دۇرىس سالىستىرىلماعان جاڭىلىس دەرەكتەر بەرىلىپ جاتىر. بۇل جونىندە ايتارىم، 2015-جىلدىڭ سوڭىنداعى جاعداي بويىنشا قازاقستاننىڭ سىرتقى مەملەكەتتىك جانە مەملەكەتتىك تۇرعىدا كەپىلدىك بەرىلگەن قارىزى - 12,8 ميلليارد ا ق ش دوللارىن قۇرادى. ال بۇل، قازاقستاننىڭ جالپى ىشكى ءونىمىنىڭ 7 پايىزىن عانا قۇرايدى. ال قالعان قارىزداردىڭ باسىم بولىگى ۇكىمەت پەن ۇلتتىق بانككە تيەسىلى»، - دەدى د. اقىشەۆ.
اۆتور: ايبوتا جاپپاربەرگەن
