قاڭتار وقيعاسى: تالدىقورعاندا 2 پوليتسەي سوتتالدى

ال، وسى فاكتىنى جاسىرعان ارىپتەسىنە 4 جىلعا باس بوستاندىعىن شەكتەۋ جازاسى تاعايىندالدى، دەپ حابارلايدى قازاقپارات ءتىلشىسى.

تالدىقورعان قالالىق سوتىندا ابايسىزدا جابىرلەنۋشىنىڭ ولىمىنە اكەپ سوققان ازاپتاۋ فاكتىسى بويىنشا (146-باپتىڭ 3-بولىگى 2022 -جىلعى ق ك رەداكسياسىندا)، سونداي-اق قىلمىستى جاسىرۋ بويىنشا (ق ك 432-بابى) قىلمىستىق ءىسى قارالدى.

انىقتالعانىنداي، 2022 -جىلدىڭ 8-قاڭتارىندا پوليتسيا باسقارماسىنىڭ قىزمەتكەرلەرى «جاپپاي تارتىپسىزدىكتەرگە قاتىسقان» دەگەن كۇدىكپەن جابىرلەنۋشى م. -نى ۋاقىتشا ۇستاۋ يزولياتورىنا (ۋ ۇ ي) جەتكىزگەن. ۋ ۇ ي عيماراتىندا ءوزىنىڭ قىزمەتتىك مىندەتتەرىن اتقارعان سوتتالۋشى ب. جابىرلەنۋشىگە جاراقات كەلتىرىپ، ول اۋرۋحانادا قايتىس بولعان. ەكىنشى سوتتالۋشى س. وسى اۋىر قىلمىس فاكتىسىن جاسىرعان.

تاراپتاردىڭ ۇستانىمى بويىنشا، پروكۋرور ب. -نى 11 جىلعا باس بوستاندىعىنان ايىرۋدى، س. -نى 3 جىلعا باس بوستاندىعىنان ايىرۋدى سۇرادى.

جابىرلەنۋشىنىڭ وكىلدەرى پروكۋروردى قولدادى. سوتتالۋشى ب. كىناسىن مويىندامادى، سوتتان ءوزىن اقتاۋدى سۇرادى. س. كىناسىن مويىنداپ، وكىندى.

«ايىپتالۋشىلاردىڭ كىناسى ءىس بويىنشا جينالعان دالەلدەمەلەرمەن، كۋاگەرلەردىڭ ايعاقتارىمەن، سوت ساراپتامالارىنىڭ قورىتىندىلارىمەن دالەلدەندى. سوت ۇكىمىمەن ب. ق ك-نىڭ 146-بابىنىڭ 3-بولىگى بويىنشا كىنالى دەپ تانىلدى جانە وعان 10 جىل مەرزىمگە باس بوستاندىعىنان ايىرۋ جازاسى تاعايىندالدى. س.-عا ق ك-نىڭ 432-بابى بويىنشا 4 جىل مەرزىمگە باس بوستاندىعىن شەكتەۋ جازاسى تاعايىندالدى»، - دەلىنگەن جەتىسۋ وبلىستىق سوتى باسپا ءسوز قىزمەتىنىڭ حابارلاماسىندا.

سونداي-اق، سوتتالعانداردان جابىرلەنۋشىلەردىڭ پايداسىنا 15 ميلليون تەڭگە سوماسىندا مورالدىق زيان ءوندىرىلدى.

سوت ۇكىمى زاڭدى كۇشىنە ەنگەن جوق.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى