قازاقستان 2 تريلليون تەڭگەگە تۇرىك بروندى تەحنيكاسىن ساتىپ الايىن دەپ جاتقان جوق - مينيسترلىك
«بۇگىنگى تاڭدا تۇرىك تاراپىمەن بروندى تەحنيكانى جەتكىزۋ بويىنشا ەشقانداي كەلىسىم جوق. «Otokar» كومپانياسى - بروندى تەحنيكا وندىرۋشىلەردىڭ ءبىرى عانا، ونىڭ ۇلگىلەرى قىزمەتكە قابىلداۋ ەرەجەلەرىندە بەكىتىلگەن راسىمگە سايكەس جالپى نەگىزدە قارالادى. بۇل تۋرالى قورعانىس مينيسترلىگى بۇعان دەيىن حابارلاعان بولاتىن. بۇل رەتتە تەحنيكانىڭ باسقا دا شەتەلدىك ۇلگىلەرى قاراستىرىلادى» دەيدى مينيسترلىك.
قازىرگى ۋاقىتتا اتالعان كومپانيانىڭ 8x8 بروندى تەحنيكاسىنىڭ ۇلگىسى وتاندىق بروندى تەحنيكانىڭ ۇلگىسىمەن قاتار تاجىريبەلىك سىناقتان ءوتىپ جاتىر.
ونىڭ ناتيجەسى بويىنشا تەحنيكالىق تالاپتارعا ساي تەحنيكانىڭ ۇلگىسى ايقىندالادى.
ەستەرىڭىزگە سالا كەتەيىك، قورعانىس مينيسترلىگى ءوز قۇزىرەتى شەڭبەرىندە مەملەكەتتىڭ قورعانىس قابىلەتىنە جاۋاپ بەرەدى جانە قارۋ- جاراق پەن اسكەري تەحنيكانىڭ ءارتۇرلى ۇلگىلەرىنە قاجەتتىلىك بار.
بۇل رەتتە قورعانىس ۆەدومستۆوسى ءۇشىن ۇلگىلەردى تاڭداۋ كەزىندە وتاندىق جانە حالىقارالىق ساراپشىلار مويىنداعان ءونىمنىڭ ساپاسىنا باسىمدىق بەرىلەدى.
«سوندىقتان الەۋمەتتىك جەلىلەردە تارالاتىن ءارتۇرلى جالعان اقپاراتتارعا سۇيەنبەي، تەك تەكسەرىلگەن، رەسمي اقپارات كوزدەرىنە سەنۋدى سۇرايمىز» دەيدى ۆەدومستۆودان.
ەسكە سالا كەتەيىك، قورعانىس مينيسترلىگى بۇگىن تۇندە عانا تۇركيادان اسكەري تەحنيكا ساتىپ الۋ ماسەلەسىنە باسقاشا پىكىر بىلدىرگەن بولاتىن. بۇل تۋرالى قازاقپارات ءتىلشىسىنىڭ ساۋالىنا جاۋاپ بەرگەن قورعانىس مينيسترلىگىنىڭ باسپا ءسوز قىزمەتىنەن ءمالىم ەتتى.
«اسكەري دوكتريناعا جانە قازاقستان رەسپۋبليكاسىنىڭ قارۋلى كۇشتەرىنىڭ باسقا اسكەري قۇرالىمدارىن دامىتۋ تۇجىرىمداماسىنا سايكەس، قورعانىس مينيسترلىگى اسكەردى زاماناۋي، كوپفۋنكتسيونالدى ءارى جوعارى تەحنولوگيالىق قارۋ- جاراقپەن جانە اسكەري تەحنيكامەن جاراقتاندىرۋ بويىنشا تۇراقتى نەگىزدە جۇمىس جۇرگىزۋدە. بۇگىنگى تاڭدا قارۋلى كۇشتەردىڭ ماماندارى وتاندىق جانە شەتەلدىك وندىرىستەگى 8x8 بروندالعان كولىكتەرگە سالىستىرمالى تالداۋ جۇرگىزۋدە. ونىڭ قورىتىندىسى بويىنشا وسى تيپتەگى ماشينالاردى قولدانۋ بويىنشا ۇسىنىستار ازىرلەنەتىن بولادى»، - دەپ جاۋاپ بەردى ۆەدومستۆونىڭ باسپا ءسوز قىزمەتىنەن ءتىلشى ساۋالىنا وراي.
ايتا كەتەيىك، كەشە تۇركيا مەن وتاندىق ب ا ق بەتتەرىندە قازاقستان اسكەرى تۇركيالىق «Otakar» كومپانياسىنان 4,4 ميلليارد دوللارعا (2 تريلليون تەڭگە) 800-دەن استام ARMA بروندى كولىكتەرىن ساتىپ الۋدى جوسپارلاپ وتىرعانى تۋرالى مالىمەت تارادى. قورعانىس مينيسترلىگى قانشا كولىك قاجەت ەكەنىن جانە وعان قانداي كولەمدە قاراجات جۇمسالاتىنىن مالىمدەگەن جوق.
