اتىراۋ وبلىسىندا كارىز قۇدىعىن جوندەپ جاتقان 2 جۇمىسشى كوز جۇمدى
وقيعا بۇگىن، 13-شىلدەدە جىلىوي اۋدانىنداعى جاڭا قاراتون كەنتىندە بولعان. بۇل دەرەكتى «جىلىوي سۋ» مەكەمەسى راستادى.
«بۇگىن جىلىوي اۋدانىندا جوندەۋ جۇمىستارىن جۇرگىزۋ كەزىندە «جىلىوي سۋ» مەكەمەسىنىڭ 2 جۇمىسشىسى كارىز قۇدىعىندا قازا تاپتى. اتىراۋ وبلىسىنىڭ مەملەكەتتىك ەڭبەك ينسپەكتسياسى باسقارماسى وسى جاعدايدى تەكسەرۋ بويىنشا ارنايى كوميسسيا قۇردى»، - دەپ حابارلادى كوممۋنالدىق مەكەمەدەن.
جىلىوي اۋداندىق توتەنشە جاعدايلار ءبولىمىنىڭ باسشىسى ناريمان وتەشوۆتىڭ ايتۋىنشا، جۇمىسشىلاردىڭ قۇدىققا قۇلاعانى تۋرالى حابار 9:42 دە تۇسكەن. حاباردى جاڭا قاراتون كەنتىنىڭ تۇرعىندارى بەرگەن.
كارىز قۇدىعىنىڭ تەرەڭدىگى - شامامەن 7-8 مەتر. ەكى جۇمىسشى جوندەۋ جۇرگىزۋ كەزىندە قۇدىققا قۇلاپ كەتكەن. جوندەۋ جۇمىسىنا نەگىزىنەن 5 ادامنان تۇراتىن بريگادا تارتىلعان.
«جىلىوي سۋ» مەكەمەسى قازا تاپقان جۇمىسشىلاردىڭ وتباسىنا ماتەريالدىق كومەك كورسەتەدى.
ەسكە سالا كەتەلىك، بۇدان بۇرىن اتىراۋ وبلىسىندا تەرەزەدەن قۇلاعان ءۇش بالانىڭ بىرەۋى مەرت بولعانىن حابارلاعان ەدىك. وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبىنان ءمالىم ەتكەندەي، جىل باسىنان بەرى بالالاردىڭ تەرەزەدەن قۇلاۋىنا بايلانىستى 3 دەرەك تىركەلگەن.
«بيىل اتىراۋ وبلىسىندا 3 بالا تەرەزەن قۇلاپ كەتتى. ونىڭ ىشىندە 2 جاعداي - اتىراۋ قالاسىندا، بىرەۋى - يندەر اۋدانىندا تىركەلىپ وتىر. ەكى بالا اۋرۋحاناعا ءتۇسىپ، ەمدەلىپ شىقتى. وكىنىشكە قاراي، قۇلاعان بالانىڭ بىرەۋى مەرت بولدى. بالالاردىڭ تەرەزەدەن قۇلاۋىنا بىرنەشە سەبەپ بار. بىرىنشىدەن، اسىرەسە، جاز مەزگىلىندە تۇرعىندار كوپقاباتتى ۇيلەردىڭ تەرەزەسىنە ارناۋلى بەكىتكىش قوندىرىمايدى. ەكىنشىدەن، اتا- انالار بالالارىن ۇيدە قاراۋسىز قالدىرادى»، - دەپ حابارلادى دەپارتامەنتتىڭ قوعاممەن بايلانىس توبى.
