بيىل ينفلياتسيانى 2 ەسە تومەندەتۋ كەرەك - ۇكىمەت باسشىسى
«ينۆەستيتسيا ءۇشىن جاھاندىق باسەكەلەستىك جاعدايىندا ستراتەگيالىق ينۆەستورلاردى تارتۋ جۇمىسىن كۇشەيتۋ قاجەت. ينۆەستورلاردىڭ ارقايسىسىمەن تىكەلەي جۇمىس ىستەپ، كەلىسسوزدەردىڭ ءار ساتىسىن باقىلاۋعا الۋ كەرەك»، - دەدى پرەمەر- مينيستر.
ۇكىمەت باسشىسى مينيسترلىكتەر مەن ءوڭىر اكىمدىكتەرى وسى باعىتتاعى بەلسەندى جۇمىستى جالعاستىرۋى تيىستىگىن باسا ايتتى.
«الدىمىزدا تۇرعان اسا ماڭىزدى مىندەتتىڭ ءبىرى - باعانىڭ ءوسۋىن تەجەۋ. قابىلدانىپ جاتقان شارالاردىڭ ناتيجەسىندە 6 ايدىڭ قورىتىندىسى بويىنشا ينفلياتسيانىڭ جىلدىق كورسەتكىشى 14,6 پايىزعا دەيىن تومەندەدى. دەگەنمەن، وسى جىلى ينفلياتسيانى 2 ەسە تومەندەتۋ كەرەك. بۇل ءبىزدىڭ بارىمىزدەن ۇيلەسىمدى جانە جۇيەلى جۇمىستاردى تالاپ ەتەدى. ساۋدا مينيسترلىگى مۇددەلى مەملەكەتتىك ورگاندارمەن بىرلەسىپ، ينفلياتسيانى جوسپارلى مانگە دەيىن تومەندەتۋ شارالارىن قامتاماسىز ەتۋى قاجەت»، - دەدى ءاليحان سمايىلوۆ.
ەلىمىزدە ينفلياتسيا 4 اي قاتارىنان تومەندەپ كەلەدى. بۇل تۋرالى ۇكىمەت وتىرىسىندا ۇلتتىق بانك ءتوراعاسىنىڭ ورىنباسارى ۆيتالي تۋتۋشكين ايتتى.
«قازاقستاندا ينفلياتسيا ماۋسىم ايىندا جىلدىق ماندە 14,6 پايىزعا جەتىپ، ءتورت اي قاتارىنان تومەندەۋدە. ماۋسىمدىق فاكتورلاردىڭ ايقىن كورىنۋىنەن ازىق- تۇلىك ينفلياتسياسىنىڭ تۇتىنۋ باعالارىنىڭ جالپى وسۋىنە قوساتىن ۇلەسى ازايۋدا. ۇلتتىق بانك ينفلياتسيانىڭ وسى جىلدىڭ سوڭىنا قاراي 11-14 پايىزعا دەيىن باياۋلاۋىن كۇتەدى»، - دەدى ول.
ونىڭ اتاپ وتۋىنشە، ازىق- تۇلىككە الەمدىك باعانىڭ ودان ءارى تومەندەۋى جانە ساۋدا ارىپتەس ەلدەرىندەگى ينفلياتسيانىڭ تومەندەۋى ينفلياتسياعا تەجەۋشى ىقپال ەتەدى. پروينفلياتسيالىق تاۋەكەلدەر ىشكى فاكتورلار تاراپىنان ساقتالىپ وتىر. ول - ينفلياتسيالىق كۇتۋلەردىڭ جوعارى دەڭگەيدە ورنىعۋ ىقتيمالى، فيسكالدىق ىنتالاندىرۋدىڭ كۇشەيۋى، جانار- جاعارماي مەن تۇرعىن ءۇي- كوممۋنالدىق شارۋاشىلىعى قىزمەتتەرى باعالارىنىڭ وسۋىنەن بولاتىن بارىنشا كۇشتى جاناما اسەر ەتۋ.
«5 -شىلدەدە ۇلتتىق بانك بازالىق مولشەرلەمەنى جىلدىق 16,75 پايىز دەڭگەيىندە ساقتاۋ تۋرالى شەشىم قابىلدادى. ينفلياتسيانىڭ باياۋلاۋى بولاشاقتا بازالىق مولشەرلەمەنى بىرتىندەپ تومەندەتۋ ءۇشىن جاعداي جاساۋدا. بولجامدىق راۋند ناتيجەسىن نەگىزگە الا وتىرىپ، بازالىق مولشەرلەمە بويىنشا كەلەسى شەشىم قابىلداۋ كەزىندە ۇلتتىق بانك بازالىق مولشەرلەمەنى جان- جاقتى قاراۋ ارقىلى تومەندەتۋ ورىندىلىعىن باعالايدى»، - دەدى ۆيتالي تۋتۋشكين.
اۆتور:
مارلان جيەمباي
