قاراعاندىدا ەر ادام ايەلى مەن 2 جاسار قىزىن كەپىلدىككە الدى
26- ءساۋىر كۇنى ساعات 12.00 شاماسىندا قاراعاندى قالالىق پوليتسيا باسقارماسىنا قاراستى تەمىرجول پوليتسيا بولىمىنە قالاداعى كوپقاباتتى ۇيلەردىڭ بىرىندە جانجال بولىپ جاتقانى تۋرالى حابارلاما تۇسكەن. وقيعا ورنىنا جەدەل تەرگەۋ توبى جىبەرىلىپ، حابارلاما راستالعان.
«بەلگىلى بولعانداي، 24 جاستاعى ەر ادام بىرگە تۇراتىن 21 جاستاعى كەلىنشەك پەن 2 جاسار قىزىن پىشاقپەن قورقىتىپ، كۇشتەپ ۇستاعان. الايدا ول ەشقانداي شارت قويماعان. قاسكويمەن اراداعى كەلىسسوز ءۇش ساعاتتان استام ۋاقىت جۇرگىزىلدى. ول سوزگە ەش كونبەدى. كەپىلدىكتەگى ادامداردىڭ ومىرىنە قاۋىپ تونگەندىكتەن، پوليتسيا قىزمەتكەرلەرىنە شۇعىل شەشىم قابىلداۋعا تۋرا كەلدى»، - دەيدى قاراعاندى وبلىستىق پوليتسيا دەپارتامەنتى باستىعىنىڭ ورىنباسارى ءابىل ءابىلدين.
توتەنشە جاعدايلار دەپارتامەنتىنىڭ قىزمەتكەرلەرى پاتەردىڭ ەسىگىن بۇزعان بەتتە، «ارلان» ارنايى جاساعىنىڭ قىزمەتكەرلەرى بىردەن ىشكە كىرىپ، كۇدىكتىنى قولعا ءتۇسىردى.
الدىن الا بولجام بويىنشا، ەر ادام ەسىرتكىلىك ماساڭ كۇيدە بولدى.
ايەل مەن قىزى زارداپ شەككەن جوق. ولار داعدارىس ورتالىعىنا ورنالاستىرىلىپ، پسيحولوگيالىق كومەك كورسەتىلىپ جاتىر.
اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 126-بابى 2-بولىگى 3-تارماقشاسىنا سايكەس قىلمىستىق ءىس تىركەلدى. تەرگەۋ ارەكەتتەرى جۇرگىزىلىپ جاتىر.
