قازاقشا «اۆاتار-2: سۋ جولى» كورەرمەن كوڭىلىنەن شىقتى

الەمدە شوقتىعى بيىك تۋىندى قازاقستاندىق كورەرمەندى نەسىمەن باۋرادى؟

2009 -جىلى بۇكىل الەم «اۆاتار» ەپيكالىق عىلىمي- فانتاستيكالىق فيلمىن كوردى. اراعا 13 جىل سالىپ، ايگىلى رەجيسسەر دجەيمس كەمەرون تۋىندىنىڭ 2- ءبولىمىن جارىققا شىعاردى. كوپشىلىك كۇتىپ قالعان ەكەن. فيلم ءبىزدىڭ كورەرمەن ءۇشىن كەيىپكەرلەردىڭ قازاقشا سويلەۋىمەن قۇندى. بىلتىر اۆاتاردىڭ قوس ءبولىمى قازاقشالاندى. جاڭا نۇسقاسىنىڭ مەملەكەتتىك تىلدە دىبىستالۋىنا ۇكىمەت 30 ميلليون تەڭگەگە جۋىق قاراجات بولگەن. 40 اكتەر قاتىسقان جاۋاپتى جۇمىس تۋرا ءبىر ايعا سوزىلدى. ونىمەن اينالىسقان ماماندار ون جىلدا ءبىر شىعاتىن سيكۆەلدىڭ كورەرمەن ەسىندە قالارىنا سەنىمدى.

نيزامي مامەدوۆ، جەكە كومپانيانىڭ ۇلتتىق جوبالار بويىنشا ءبولىم باسشىسى:

- قازاقستاندىق دۋبلياجدىڭ مەرەيى ۇستەم. سان تىلگە اۋدارىلعان شەتەلدىك فيلم كەيىپكەرلەرى راسىندا قازاقشا سويلەيدى. مەملەكەتتىك ءتىلىمىز الەمدىك قاۋىمداستىقتان ويىپ تۇرىپ ورىن الدى. ەستەرىڭىزدە بولسا، 2011 -جىلى «كولىكتەر» فيلمى العاش رەت قازاق تىلىندە جارىق كوردى. مۇنىڭ ۇزدىك اۋدارما بولعانىن جاھان مويىندادى. سول ۇدەدەن تۇسپەۋگە بارىمىزدى سالىپ كەلەمىز. ارينە، ءبىز جاڭا تۋىندى جارىققا شىعارىپ جاتىرمىز. ماماندارىمىزدىڭ كاسىبيلىگىندە شەك جوق.

ورىسشا سەانسقا سۇرانىس باسىم دەگەندى العا تارتاتىن كينوتەاتر يەلەرى قازاق تىلىندەگى تۋىندىلاردى پرايم- تايمعا قويۋعا اسىقپايدى. بۇل جولى دا سولاي بولعان دەسە دە «اۆاتار-2. سۋ جولى» - نىڭ كورەرمەنى كوپ بوپ شىقتى. ياعني، جۇرت قازاقشا كينوعا، ونىڭ ىشىندە پرەمەرالارعا شولىركەگەن. سوندىقتان بولسا كەرەك، فيلمنىڭ قازاق تىلىندەگى نۇسقاسى پروكات بويىنشا ابسوليۋتتى رەكورد ورناتتى. كاسسالىق ءتۇسىم - 72 ميلليون تەڭگەگە جەتكەن.

ولەگ ريابچەنكو، ق ر مادەنيەت جانە سپورت مينيسترلىگىنىڭ باسپا ءسوز حاتشىسى:

- فيلمدى اۋدارۋعا كەتكەن شىعىن وتەلدى. مۇنى كاسسالىق تۇسىمنەن- اق اڭعارۋعا بولادى. وڭ تۇسى بۇل عانا ەمەس. ەڭ باستىسى، قازاق ءتىلىنىڭ مارتەبەسى وسكەنىن بايقادىق. البەتتە ساپالى شەتەلدىك ءونىمدى ءبىز ءوز نارىعىمىزدا دامىتا الدىق. مەملەكەت وسىنداي مۇمكىندىك جاساپ وتىر. ودان سوڭ، كورەرمەننىڭ سوزدىك قورى مولايدى، كوكجيەگى كەڭەيدى. بۇل ءساتتى جۇمىس بولدى دەۋگە تولىق نەگىز بار.

وكىنىشكە قاراي، كينوتەاترلارعا مەملەكەتتىك تىلدەگى كورسەتىلىم ۋاقىتى بويىنشا تالاپ قويۋ مۇمكىن ەمەس. بۇل زاڭمەن رەتتەلمەگەن دۇنيە. الايدا، سوڭعى كورسەتكىش ولاردى ءبىر مامىلەگە كەلتىرەر. ەندى سۇرانىسقا قاراي اۋدارمانى جۇيەلەۋ ماڭىزدى.

ەرلان تولەۋتاي، كينوسىنشى:

- جەكەلەگەن فيرمالار اينالىسىپ جاتىر، تىلدىك قورلارى وتە جۇتاڭ، قازاقتىڭ تابيعاتىنا كەلەتىن مۇلدە جوق دەۋگە بولادى، جاساندى ءتىل پايدا بولدى رەداكتورلىق مەكتەپتى بىزگە قايتادان قولعا الۋ كەرەك، ولارعا بەلگىلى ءبىر دەڭگەيدە ستاتۋس بەرۋ كەرەك، ولاردىڭ اقشاسىن كورسەڭ جىلاعىڭ كەلەدى، وسى جەتەدى دەپ، ول جەردە ءتىل ماسەلەسى تۇر عوي، ونداي فيلم كورەرمەنىڭ ىزاسىن تۋدىرادى، كورگىڭ كەلمەي قالادى. بىلتىر مەملەكەت قولداۋىمەن «قارا پانتەرا: ماڭگى ۆاكاندا» فيلمى دە دۋبلياجدالدى. ديسنەيدىڭ ءوزى كەلەشەك جوسپارىن قۇپيادا ۇستايدى. بىزدەگى دۋبلياج سالاسىنىڭ ماماندارى دا وسى سەبەپتى جاڭا جوبالارىن جاريالاۋعا اسىقپايدى.

وتكەن جىلى ەلدەگى كينوسەانستارعا 8,5 ميلليون بيلەت ساتىپ الىنعان. ونىڭ 6,6 ميلليونى - شەتەلدىك فيلمدەر. ال ۇلتتىق كينو جانكۇيەرلەرىنىڭ سانى 930 مىڭنان اسادى. ماماندار «اۆاتار 2: سۋ جولى» فيلمىنىڭ پروكاتى قازاقستان عانا ەمەس، ت م د اۋماعىندا كوش باستاپ تۇرعانىن ايتادى. بىزدە مەملەكەتتىك تىلدەگى قارالىمنىڭ ۇلەسى باسىم. دەمەك، قازاق تىلىندە سويلەيتىن الەمدىك فيلمدەر كوبەيۋى كەرەك. ال كورسەتىلىم حالىققا ىڭعايلى ۋاقىتقا قويىلادى دەپ ۇمىتتەنەمىز.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى