اتىراۋدىڭ رەسەيمەن شەكاراداعى اۋدانىندا 2 ەلدى مەكەن قۇرىلادى

قۇرمانعازى اۋداندىق قۇرىلىس، ساۋلەت جانە قالا قۇرىلىسى ءبولىمى باسشىسىنىڭ مىندەتىن اتقارۋشى رەنات نۇعمانوۆتىڭ مالىمەتىنشە، قۇرمانعازى اۋىلدىق وكرۋگىندەگى «بولاشاق» جانە «شيپاجاي» شاعىن اۋىلدارى جاڭا ەلدى مەكەن رەتىندە قايتا قۇرىلادى. قازىر مۇندا ينجەنەرلىك- كوممۋنيكاتسيالىق ينفراقۇرىلىمنىڭ قۇرىلىسى اياقتالدى.

«جوسپارعا سايكەس جوبا 468 جەر ۋچاسكەسىنە ارنالعان. كەزەكتە تۇرعان جەكە ادامدارعا تۇرعىن ءۇي قۇرىلىسى ءۇشىن 1 گەكتاردان جەر بەرىلەدى. قازىر «نۇرلى جەر» باعدارلاماسىمەن 468 جەر تەلىمىنە 13,1 شاقىرىمدىق اۋىلىشىلىك جولدار، 41,4 شاقىرىم ەلەكتر جارىعى، 27,4 شاقىرىم اۋىز سۋ، 21,4 شاقىرىمىنا گاز قۇبىرى تارتىلىپ، ۋچاسكەلەر تولىقتاي دايىندالدى. مەردىگەر مەكەمە - «قاراعاندى جولدارى» ج ش س. بۇل جوبانىڭ قۇنى 1 ميلليارد 550 ميلليون 645 مىڭ تەڭگەنى قۇرايدى»، - دەيدى رەنات نۇعمانوۆ.

ونىڭ ايتۋىنشا، قۇرمانعازى اۋىلدىق وكرۋگىندە 2016 -جىلدان بەرى جەر الۋ كەزەگىنە ەكى مىڭعا جۋىق تۇرعىن تىركەلگەن. قازىر زاڭدىلىققا سايكەس كەزەكتەگى تۇرعىندارعا جەر تەلىمى بەرىلە باستادى. بۇگىنگە دەيىن 60 تۇرعىن جەر تەلىمىن العان. ەندى كەزەكتەگى 120 تۇرعىنعا جەر تەلىمى بەرىلەدى.

ەسكە سالا كەتەلىك، بۇعان دەيىن اتىراۋ وبلىسىندا رەسەيمەن شەكاراداعى اۋىلدار اتاۋى وزگەرگەنىن حابارلاعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى