ۆاكسينا العان ادام 2 جىلدان كەيىن قايتىس بولادى دەگەن اقپارات - جالعان

بۇل تۋرالى ق ر د س م قوعامدىق دەنساۋلىق ساقتاۋ ۇلتتىق ورتالىعى «سانيتارلىق-ەپيدەميولوگيالىق ساراپتاما جانە مونيتورينگ عىلىمي-پراكتيكالىق ورتالىعى» فيليالى ديرەكتورىنىڭ ورىنباسارى م. ا. مانار سماعۇل ايتتى، دەپ حابارلايدى قازاقپارات.

«حالىق اراسىندا ۆاكسينا سالدىرعان سوڭ، ادام ەكى جىلدان كەيىن قايتىس بولادى ەكەن دەگەن حابار تاراپ جاتىر. عالامتورداعىنىڭ ءبارى تەكسەرىلگەن اقپارات ەمەس، دەگەنمەن كوپ ادام وعان سەنىپ قالادى. وسى جونىندە مامان رەتىندە نە ايتاسىز؟»، - دەگەن سۇراق قويىلدى ورتالىق كوممۋنيكاتسيالار قىزمەتىندە.

«مۇنىڭ فەيك ەكەنىن ايتىپ جاتىرمىز. وسىنداي جالعان اقپاراتتىڭ كوپ تارالۋىنان ۆاكسينالاۋ تۋرالى ءالى ويلانىپ جۇرگەندەر كوپ. سول ويلانىپ جۇرگەن ادامدارعا وسىنداي جالعان اقپارات تارالۋدا. جالپى ۆاكسينالاۋدى دەنساۋلىق ساقتاۋ سالاسىندا ءبىرىنشى جىل قولدانىپ جاتقان جوقپىز. وزدەرىڭىز بىلەسىزدەر، بالالار اراسىندا قىزىلشاعا، قىزامىققا قارسى، پنيەۆموكوكك جۇقپاسىنا قارسى ۆاكسينالاۋ جۇرەدى. ونىڭ تيىمدىلىگى بۇگىنگى كۇنى دالەلدەنگەن. اسىرەسە سال اۋرۋىن الىپ قاراساق، ۆاكسينالاۋ ارقاسىندا دۇنيەجۇزىندە سال اۋرۋى تىركەلەتىن ءۇش-اق ايماق بار»، - دەپ اتاپ ءوتتى مامان.

ال كوروناۆيرۋسكە قارسى ۆاكسينانىڭ قولدانىلىپ جاتقانىنا جارتى جىلدان ەندى عانا استى. بىلتىرعى جەلتوقسان ايىنان باستاپ يزرايل، ا ق ش ەلدەرىندە قولدانىلا باستادى.

«سوندىقتان، ەكى جىلدان كەيىن ادام ولەدى دەگەنى - ناعىز فەيك. بۇگىندە مىسالى ناقتى دەرەكتەر جوق، قايتادان ريەۆاكسينالاۋ جۇرگىزۋ كەرەك پە، جوق پا، مۇنىڭ ءبارى ءالى زەرتتەلىپ جاتىر. سوندىقتان، تولىققاندى فەيك دەپ ايتۋعا بولادى. وعان دا تاعى ءبىر دالەلى - ۆاكسينا العاندار اراسىندا اۋىرعان ادامدار سانى وتە تومەن. ول دا ۆاكسينالاۋدىڭ، اۋرۋدىڭ الدىن الۋدىڭ تيىمدىلىگىن كورسەتەدى. ياعني، بۇل فەيككە قاراما-قارسى ايتارىم - كوروناۆيرۋس جۇقتىرعاننان كەيىن 1-2 اپتادا ءولىپ كەتۋ قاۋپى جوعارى. سول سەبەپتى ءار ادام ويلانىپ، دەرەكتى اقپاراتتى وقىپ، شەشىم قابىلداعانى ءجون دەپ ويلايمىن»، - دەيدى مانار سماعۇل.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى