ءۇندىستاندا تاۋلىگىنە 2 مىڭنان استام ادام كوروناۆيرۋستان كوز جۇمۋدا
ءبىرىنشى تولقىندا تاۋلىگىنە ورتاشا العاندا 93 مىڭ تۇرعىن كوروناۆيرۋس جۇقتىرعان. 17-ساۋىردەن باستاپ كۇندەلىكتى ستاتيستيكا 200 مىڭ ادامعا دەيىن كوتەرىلىپ، سوڭعى اپتادا كۇنىنە 350 مىڭ ادامعا جەتىپ وتىر.
ءولىم سانى دا ءبىرىنشى تولقىنمەن سالىستىرعاندا ەكى ەسەگە ارتتى. سوڭعى اپتادا تاۋلىگىنە ءۇندىستاندا كوروناۆيرۋستان ورتاشا 2336 ادام قايتىس بولۋدا. ەلدەگى ەڭ اۋىر جاعداي دەليدە، مۇندا اۋرۋحانالاردا ءو ج ج ا ورناتىلعان ورىندار قالماعان. باسقا ءىرى قالالاردا دا جاعداي وسىنداي. رەسمي ستاتيستيكا بويىنشا، پاندەميانىڭ باسىنان بەرى ءۇندىستاندا 17 ميلليون ادام كوروناۆيرۋس جۇقتىرىپ، 192 مىڭ ادام قايتىس بولعان. حالىق سانىنىڭ كوپتىگى جانە ولاردىڭ ۇدايى جىلجىپ وتىرۋى Covid-19-عا تەستىلەۋ وتكىزۋگە جانە ناقتى ءولىم سانى بويىنشا ەسەپ جۇرگىزۋگە كەدەرگى كەلتىرەدى. سول سەبەپتى ءۇندىستانداعى داعدارىستىڭ شىنايى ماسشتابىن باعالاۋ قيىنعا سوعىپ وتىر.
BBC ءتىلشىسىنىڭ ايتۋىنشا، ەلدەگى ماسشتابتى ۆاكسينالاۋ باعدارلاماسى ۇلكەن قيىندىقتارعا تاپ بولۋدا. بۇل باعدارلاما 16-قاڭتار كۇنى باستالعان، شىلدەگە دەيىن 250 ميلليون ادامدى ۆاكسينالاۋدى كوزدەگەن. قازىرگى كەزدە ۆاكسينانىڭ ءبىرىنشى دوزاسىن 118 ميلليون ادام عانا العان، بۇل - حالىقتىڭ %9 ى.
«پاندەميا بىزگە بارلىق ەل پروبلەمالارىنىڭ ورتاق ەكەندىگىن ءتۇسىندىردى. ءبىر قىتاي قالاسىندا پايدا بولعان كوروناۆيرۋس ەندى بۇكىل الەمدە»، - دەيدى BBC ءتىلشىسى دجەيمس گاللاحەر.
جۇقتىرۋ رەكوردى ءۇندىستان شەكاراسىن اسۋى مۇمكىن، سول سەبەپتى كوپ ەلدەر بۇل ەلمەن اۋە قاتىناسىن توقتاتتى.
بريتانيا، برازيليا جانە وڭتۇستىك افريكادا پايدا بولعان كوروناۆيرۋستىڭ جاڭا ءتۇرى وزگە ەلدەردە ۇلكەن پروبلەمالار تۋدىردى. فيزيكا جانە بيولوگيا پروفەسسورى، جۇقپالى اۋرۋلاردى مودەلدەۋ سالاسىنداعى ساراپشى مەنون ءۇندىستاندا ۆيرۋستىڭ جاڭا ءتۇرى پايدا بولۋى مۇمكىن ەكەندىگىن ەسكەرتتى. دۇنيەجۇزىلىك قاۋىمداستىق ءۇندىستانعا داعدارىستى جەڭۋگە كومەك كورسەتۋدە. ۇلى بريتانيا ەلگە ءو ج ج ا جانە كويۋلانعان وتتەك قورلارىن جىبەردى، ا ق ش ءۇندىستانعا AstraZeneca ۆاكسيناسىن كوپ مولشەردە وندىرۋگە مۇمكىندىك بەرۋ ءۇشىن باستاپقى ماتەريالدار ەكسپورتىنا تىيىمدى ۋاقىتشا الىپ تاستادى. كوپتەگەن ەلدەر بىلىكتى قىزمەتكەرلەر مەن جەكە قاۋىپسىزدىك قۇرالدارىن ۇسىنۋدا.
اۆتور: ءبيبىحان سەرىكوۆا
