الماتىدا پوليتسيا كوشەدە 2 جاسار بالاسىن تاستاپ كەتكەن انانى ىزدەپ جاتىر

كىشكەنتاي بالانىڭ سۋرەتى الەۋمەتتىك جەلىدە تارادى. پوليتسيا دەپارتامەنتى باسپا ءسوز قىزمەتىنىڭ مالىمەتىنشە، ۇل بالانى 20-ساۋىرگە قاراعان ءتۇنى ايالدامادان ەر ادام تاۋىپ العان. ول جالعىز قالعان بالانى ۇيىنە اپارىپ، جۋىندىرىپ، كيىمىن اۋىستىرىپ، تاماقتاندىرعان. كەلەسى كۇنى پوليتسياعا كەلىپ جاعدايدى ءمالىم ەتكەن. پوليتسيا بالاعا جەدەل جاردەم شاقىرىپ، ونى مەديتسينالىق تەكسەرۋدەن وتكىزۋ ءۇشىن №2-بالالار كلينيكالىق اۋرۋحاناسىنا جەتكىزدى. قازىر ول اۋرۋحانادا.

«يۋۆەنالدى پوليتسيا ءبولىمى مەن جەتىسۋ اۋداندىق پوليتسيا باسقارماسىنىڭ قىزمەتكەرلەرى ەكى جاسار بالانىڭ اناسىن ىزدەۋدە. قازىرگى ۋاقىتتا ونىڭ اتى-ءجونى بەلگىلى بولدى. ونىڭ ەكى بالاسى بار. الاتاۋ اۋدانىنىڭ پوليتسيا باسقارماسىنىڭ مالىمەتىنشە، ايەل وسى بالاسىن بىرنەشە رەت تاستاپ كەتكەن. قازىر ونىڭ تۇرىپ جاتقان جەرىن انىقتاۋمەن اينالىسىپ جاتىرمىز. زاڭعا سايكەس شارا قولدانىلادى»، - دەپ حابارلادى پوليتسيادان. بالا «ماما» دەگەن سوزدەن باسقا ەشتەڭە ايتپايدى.

اۆتور: الما مۇقانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى