الماتى وبلىسىنداعى 2 جاسار بالاسىن ءولتىرىپ، ءمايىتىن مۇزداتقىشتا ساقتاعان ايەل تۋرالى كورشىلەرى ايتىپ بەردى
«ايەلدىڭ اپايى بىزگە جۇگىرىپ كەلىپ، بالا مۇزداتقىشتا ءولىپ جاتىر دەدى. ءبىز بىردەن پوليتسيا شاقىردىق. بالانى شىلدە ايىنىڭ ورتاسىنان كەيىن كورمەدىك. بۇرىن كۇيەۋىمەن رەسەيدە تۇرعان. قازىر ءبىر جىلدان بەرى وسى جەردە تۇرادى. بالاسىن ىلعي جىلاتىپ جاتادى. بىزگە جاقىن تۇرعاندىقتان جىلاعان داۋىسىن دا ەستيتىنبىز. بالاسى ءبىزدىڭ ۇيگە كەلىپ، ۇنەمى مەنىڭ قاسىمدا جۇرەتىن. بالا ۇيگە بارمايمىن دەيتىن. ال ايەلدىڭ ءوزى سوڭعى كەزدە جاعالاي قارىز سۇراپ كەتتى. كورشىلەردىڭ بارىنە قارىز. ءبىراق ۇلىن ولتىرگەندىگى جايلى سىر بىلدىرمەدى. بالا قايدا دەپ سۇراساق، تالدىقورعاندا تاربيەشىدە دەيدى، بولدى»، - دەدى قاراتال اۋدانىنا قاراستى ۇشتوبە قالاسىنىڭ تۇرعىنى ليۋبوۆ سلەسارەنكو.
تۋعان ۇلىن ءولتىرىپ، مۇردەسىن ەكى ايعا جۋىق ۋاقىتتان بەرى مۇزداتقىشتا ۇستادى دەگەن كۇدىككە ىلىنگەن ايەل قازىر قاماۋدا وتىر.
ەستەرىڭىزگە سالا كەتەيىك، بۇعان دەيىن الماتى وبلىسىنىڭ ۇشتوبە قالاسىندا 27 جاستاعى ايەل ەكى جاستاعى بالاسىن ءولتىردى دەگەن كۇدىكپەن ۇستالعانىن حابارلاعان بولاتىنبىز. كۇدىكتى ۇلىن ولتىرگەنىن مويىنداعان. ايەلدىڭ ايتۋىنشا، ول بالانىڭ اكەسىمەن اجىراسقان، اكەسى وزگە ەلدە تۇرادى.
اۆتور: سامال قابىشيەۆا
