كوروناۆيرۋستان قايتىس بولعان وسكەمەندىك ايەلدىڭ جۇرەگى 2 رەت توقتاپ قالعان

بۇل تۋرالى بۇگىن «حابار 24» تەلەارناسىنان شىعىس قازاقستان وبلىستىق دەنساۋلىق ساقتاۋ باسقارماسىنىڭ باسشىسى ءىلياس مۇحامەدجان ايتتى، دەپ حابارلايدى قازاقپارات ءتىلشىسى.

«بۇگىن شىعىس قازاقستان وبلىسىندا كوروناۆيرۋس ىندەتىنەن ءبىر ادام كوز جۇمدى. وكىنىشكە قاراي، بۇل جاعداي وسكەمەن قالاسىندا تىركەلدى. ول 1979 -جىلى دۇنيەگە كەلگەن ايەل. 12-ءساۋىر كۇنى جەدەل جاردەم بريگاداسىمەن ارنايى پروۆيزورلىق ستاتسيونارعا جەتكىزىلگەن. ول جەردە ارنايى پ ت ر-دياگنوستيكاسى وتكىزىلىپ، ۆيرۋستىق ىندەت راستالدى. ناۋقاس تۇسكەن كەزدە جاعدايى اۋىر بولدى. دياگنوز راستالعاننان كەيىن ازاماتشا ارنايى ينفەكسيالىق بوكسقا، قارقىندى ەمدەۋ پالاتاسىنا اۋىستىرىلدى. تۇسكەن كەزدەگى جاعدايى وتە اۋىر»، - دەدى ول.

ونىڭ دەرەگىنشە، ناۋقاس ەكىجاقتى پنيەۆمونيا، سول جاقتى پليەۆريت، ءجىتى رەسپيراتورلىق ديسترەسس-سيندروم، سونىمەن قاتار اۋىر الكوگولدىك ينتوكسيكاتسيا دياگنوزىمەن تۇسكەن. «ناۋقاستىڭ ءومىرىن ساقتاۋ ءۇشىن بارلىق دارىگەر-رەانيماتولوگتار وزدەرىنىڭ قۇرال- جابدىقتارىمەن، كەرەكتى اپپاراتتارىمەن كومەك كورسەتتى. ازاماتشا وكپەنى جاساندى جەلدەتۋ اپپاراتىنا قوسىلعان بولاتىن. ءتۇنى بويى ەكى مارتە جۇرەگى توقتاعان. رەانيماتسيالىق ءىس- شارالاردىڭ ناتيجەسى وڭ بولدى. ءۇشىنشى مارتە جۇرەگى توقتاعان كەزدە رەانيماتسيالىق ارەكەتتەر ناتيجە بەرمەدى. جۇرەك قىزمەتىن قايتادان قالپىنا كەلتىرۋ ءۇشىن ارىپتەستەرىمىز بارلىق كۇش- جىگەرىن سالدى. ءبىراق، وكىنىشكە قاراي، ول ومىردەن ءوتتى. ناۋقاستىڭ تۋعان-تۋىستارى مەن جاقىندارىنا قايعىرا كوڭىل ايتامىز»، - دەدى باسقارما باسشىسى.

ءىلياس مۇحامەدجاننىڭ ايتۋىنشا، قايتىس بولعان ايەلمەن بايلانىستا بولعان 13 ادام انىقتالىپ، وقشاۋلاندىرىلدى. اناليزدەر الىندى.

«قازىرگى تاڭدا كەڭەيتىلگەن ەپيدەميولوگيالىق ءىس-شارالار وتكىزىلىپ جاتىر. تۇرعىلىقتى جەرى مەن وشاقتار تولىقتاي زالالسىزداندىرىلدى»، - دەدى ول. شىعىس قازاقستان وبلىسىندا كوروناۆيرۋستان ءبىر ادام كوز جۇمعانىن بۇعان دەيىن جازعان بولاتىنبىز.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى