كوروناۆيرۋس: الەمدىك ەكونوميكا شىعىنى 2 تريلليون دوللارعا جەتۋى مۇمكىن
كوروناۆيرۋستىڭ ورشۋىنەن تىكەلەي شەتەلدىك ينۆەستيتسيا (ت ش ي) اعىنى كولەمى قىسقارادى. ب ۇ ۇ- نىڭ ساۋدا جانە دامۋ جونىندەگى كونفەرەنتسياسى (يۋنكتاد) ۇيىمى وسىلاي ءمالىم ەتتى. ۇيىم ساراپشىلارى قۇندى قاعازدار مەن كەن ءوندىرۋشى ونەركاسىپ ينۆەستيتسياسىنا سۇرانىس كۇرت تومەندەۋى ىقتيمال دەپ بولجاۋدا.
ەڭ كوپ شىعىنعا ۆيرۋسپەن كۇرەستە راديكالدى شارالار قابىلداۋعا دەيىن بارعان اۋرۋ جۇقتىرعاندار دەڭگەيى جوعارى، سونداي-اق قىتايداعى وندىرىستەرگە تاۋەلدى مەملەكەتتەر ۇشىرايدى. ولاردىڭ قاتارىندا كورەيا رەسپۋبليكاسى، جاپونيا مەن وڭتۇستىك-شىعىس ازيا ەلدەرى بار. مۇناي مەن شيكىزات تاۋارلارىن ەكسپورتتاۋشى ەلدەرگە دە جاعداي اۋىر تيەدى، ولار ەكونوميكالىق ءوسىمنىڭ ءبىر پايىزىنان استامىن جوعالتۋى مۇمكىن.
الدىن الا بولجام بويىنشا، كوروناۆيرۋس سالدارىنان الەمدىك ەكونوميكا شىعىنى 2 تريلليون دوللاردى، ال دامۋشى ەلدەردە 220 ميلليارد دوللاردى قۇراۋى مۇمكىن.
ساراپشىلار ورتالىق بانكتەر بۇل داعدارىستى ەڭسەرە المايدى، كولەمدى بيۋجەتتىك شىعىنداردى قاجەت ەتەدى دەپ قاۋىپتەنەدى.
سونداي-اق يۋنكتاد ساراپشىلارى كوروناۆيرۋستىڭ ءورشۋى تىكەلەي شەتەلدىك ينۆەستيتسيانىڭ جاھاندىق اعىنىنا كەرى اسەرىن تيگىزەتىندىگىن ايتۋدا. بۇعان دەيىن ولار 2020-2021-جىلداردا ت ش ي دەڭگەيى ايتارلىقتاي وسەدى دەپ بولجاعان بولاتىن. ءبىراق قازىر ولاردىڭ پىكىرىنشە، كوروناۆيرۋسقا بايلانىستى ينۆەستيتسيا ءتۇسىمى 5-15 پايىزعا تومەندەۋى مۇمكىن.
