از قامتىلعان وتباسىلارعا يپوتەكا 2 پايىزبەن بەرىلەدى - قارجى مينيسترلىگى
ۆيتسە-ءمينيستردىڭ ايتۋىنا قاراعاندا، بۇل باعىتتا 2019-جىلى 100 ميلليارد تەڭگە بولىنگەلى وتىر. بۇل شارالاردىڭ ءبارى دە «نۇرلى جەر» مەملەكەتتىك باعدارلاماسى اياسىندا ەكى باعىت بويىنشا جۇزەگە اسىرىلادى.
«بىرىنشىدەن، كوپبالالىلار ساناتىنداعى از قامتىلعان وتباسىلار سالۋ جانە كۇردەلى جوندەۋ ارقىلى، ساتىپ الۋ قۇقىعىنسىز جالعا بەرىلەتىن باسپاناعا قول جەتكىزەتىن بولادى. بۇل باعىتتاعى قادام جىل سايىن 6 مىڭ پاتەردى پايدالانۋعا بەرۋگە جول اشادى»، - دەيدى تاتيانا ساۆەليەۆا ماجىلىستەگى قازاقستاننىڭ 2019-2023-جىلدارعا ارنالعان الەۋمەتتىك-ەكونوميكالىق دامۋ بولجامىن ناقتىلاۋعا ارنالعان وتىرىسى بارىسىندا.
ونىڭ ايتۋىنشا، از قامتىلعان، كوپبالالى، تولىق ەمەس جانە كىرىسى تومەن ءارى مۇگەدەك بالانى تاربيەلەپ وتىرعان وتباسىلاردى «تۇرعىن ءۇي جيناق بانكى» ارقىلى الەۋمەتتىك نەسيەلىك باسپانامەن قامتاماسىز ەتۋ جوسپارلانعان.
«مۇنداي وتباسىلارعا 20 جىل مەرزىمگە جىلدىق 2 پايىزبەن الدىن الا ارالىق تۇرعىن ءۇي نەسيەسى بەرىلەتىن بولادى»، - دەيدى ول.
وتىرىس بارىسىندا دەپۋتاتتاردىڭ سۇراقتارىنا جاۋاپ بەرە كەلە قر يندۋستريا جانە ينفراقۇرىلىمدىق دامۋ ۆيتسە-ءمينيسترى قايىربەك وسكەنبايەۆ جالعا بەرىلەتىن ءۇي كەزەگىندە تۇرعان 28 مىڭ ادام بارىن، ونىڭ 4800 ءى تۇركىستان وبلىسىندا تۇراتىنىن ءمالىم ەتتى.
«ەكىنشى ورىندا - الماتى وبلىسى. ونداي ساناتتاعى وتباسىلاردىڭ ەڭ ازى - سولتۇستىك قازاقستان وبلىسىندا (342). ولاردىڭ ءبارى دە البەتتە اۋدان ورتالىعىندا تۇرمايدى. ءتىزىمدى قازىردىڭ وزىندە جاساقتادىق»، - دەيدى قايىربەك وسكەنبايەۆ.
ونىڭ ايتۋىنا قاراعاندا، جالعا بەرىلەتىن ءۇي قۇرىلىسى ءۇشىن 50 ميلليارد تەڭگە بولىنەدى.
