الماتىدا 2 پروتسەنتتىك يپوتەكا قالاي بەرىلەدى
پرەزيدەنتتىڭ تاپسىرماسى اياسىندا «نۇرلى جەر» باعدارلاماسىنا وزگەرىستەر ءالى ەنگىزىلمەسە دە، قالا اكىمدىگى «باقىتتى وتباسى» جوباسى اياسىندا كەزەكتە تۇرعان كوپبالالى وتباسىلارعا جەڭىلدەتىلەن يپوتەكانى بەرۋدى كوزدەيدى، دەپ حابارلايدى قازاقپارات ءتىلشىسى.
«نەگىزى، الماتى قالاسىنىڭ اكىمدىگى اتالعان جوبانى بۇرىننان بەرى ازىرلەپ جاتىر. ول باستاما پرەزيدەنتتىڭ تاپسىرماسىمەن سايكەس كەلدى دەۋگە بولادى. نەگىزى، قازىرگى كەزدە «نۇرلى جەر» باعدارلاماسىنا وزگەرىستەر ەنگىزىلىپ جاتىر. سونىڭ اياسىندا قازاقستاننىڭ بارلىق كوپبالالى وتباسىلارى جانە تاعى بىرنەشە ساناتقا جاتاتىن ازاماتتار جەڭىلدەتىلگەن يپوتەكا الاتىن بولادى. ال الماتى اكىمدىگى ءوز بيۋدجەتىنەن قوسىمشا قارجى ءبولىپ، ونى ايماقتىق دەڭگەيدە باستاپ كەتتى. «باقىتتى وتباسى» تەك الماتى قالاسىنىڭ كوپبالالى وتباسىلارىنا ارنالعان. ونى باعدارلاما ەمەس، بيۋدجەتتىك نەسيەلەندىرۋ دەپ اتايدى»، - دەيدى تۇرعىن ءۇي قۇرىلىس جيناق بانكى باسپا ءسوز قىزمەتىنىڭ ماماندارى.
بيۋدجەتتىك نەسيەلەندىرۋ اياسىندا كوپبالالى وتباسىلارعا تۇرعىن ءۇي قۇرىلىس جيناق بانكى ارقىلى 2 پروتسەنتتىك يپوتەكا بەرىلەدى. زايمدى 15 ميلليون تەڭگەگە دەيىن الۋعا مۇمكىندىك بار. ونى الۋ ءۇشىن 10 پروتسەنتتىك العاشقى جارنانى قۇيۋ قاجەت. ءبىراق كوپبالالى وتباسىلارعا بيۋدجەتتىڭ ەسەبىنەن 1 ميلليون تەڭگە كولەمىندە تۇرعىن ءۇي كۋالىكتەرى بەرىلەدى. سونى العاشقى جارنا رەتىندە قولدانۋعا بولادى.
«بۇگىندە الماتىدا ءبىر مىڭنان استام كوپبالالى وتباسى باسپانا كەزەگىندە تۇر. «باقىتتى وتباسى» جوباسى ءدال وسى ازاماتتارعا جەڭىلدەتىلگەن نەسيەلەر بەرىلەتىن بولادى. قازىرگى كەزدە baqytty-otbasy.kz سايتىندا ءوتىنىش بەرۋگە بولادى. ونىمەن الماتى قالاسىنىڭ اكىمدىگى اينالىسىپ جاتىر. ولار قۇجاتتاردى جينايدى دا، ءتىزىمدى جاساپ شىعادى. نەگىزى، قازىرگى باسپانا كەزەگى بار عوي. وندا 1276 ادام تىركەلگەن. ەندى، ولار قاتىسامىز دەپ، ءوز وتىنىشتەرىن بەرۋى كەرەك. سول بويىنشا ءتىزىم جاسالادى. تۇرعىن ءۇي قۇرىلىس جيناق بانكى سوعان قاراپ، ءاربىر وتباسىنىڭ تولەم قابىلەتتىلىگىن تەكسەرەدى دە، 2 پروتسەنتتىك يپوتەكانى بەرەدى»، - دەپ اتاپ كورسەتتى بانك قىزمەتكەرلەرى.
تۇرعىن ءۇي قۇرىلىس جيناق بانكى «باقىتتى وتباسى» جوباسىنا قاتىساتىن كوپبالالى وتباسىلاردىڭ تولەم قابىلەتتىلىگىن جەڭىلدەتىلگەن تارتىپپەن تەكسەرمەكشى. قاتىسۋشى ادام يپوتەكانىڭ اي سايىنعى تولەماقىسىن اۋدارا الاتىنىن راستاسا بولدى. بالالارعا كەتەتىن شىعىندار ەسكەرىلمەيدى. ماسەلەن، 15 ميلليون تەڭگەنىڭ پاتەرى ءۇشىن اي سايىن 79000 تەڭگە تولەۋ كەرەك.
بۇدان بولەك، باسپانانى جاڭا پاتەرلەر نارىعىنان ساتىپ الۋ قاجەت. ول ءۇشىن ءبىر اي بەرىلەدى. كوپبالالى وتباسى وسى ۋاقىتتىڭ ىشىندە پاتەر تابا الماسا، يپوتەكا كەزەكتى تۇرعان باسقا ادامعا بەرىلەدى.
ايتا كەتەيىك، بۇعان دەيىن قازاقپارات «باقىتتى وتباسى» بويىنشا قۇجات قابىلداۋ ناۋقانىنىڭ باستالعانىن حابارلاعان بولاتىن. «باقىتتى وتباسى» باعدارلاماسىنىڭ رەسمي سايتىندا بيۋدجەتتىك يپوتەكانى الۋدىڭ بارلىق شارتتارى، تاپسىرىلاتىن قۇجاتتاردىڭ ءتىزىمى مەن ءوتىنىم بەرۋ جولدارى كورسەتىلگەن. ءوتىنىشتى پورتال ارقىلى بەرۋگە بولادى. ول ءۇشىن ادامدا ەلەكتروندىق سيفرلى قولتاڭبا بولۋى شارت.
اۆتور: ارمان اسقاروۆ
