قازاقستاندا تۋريزمدى دامىتۋعا 2 تريلليون تەڭگە بولىنەدى
دەپ حابارلايدى قازاقپارات ءتىلشىسى.
«ەلباسى تۋريزمدى دامىتۋ بويىنشا اسا ماڭىزدى مىندەتتەر مەن تاپسىرمالار قويىپ وتىر. الدىن الا باعالاۋ بويىنشا مەملەكەتتىك باعدارلامانى ىسكە اسىرۋ ناتيجەسىندە 2025 -جىلعا قاراي تۋريزم سالاسىنىڭ جالپى ىشكى ونىمدەگى ۇلەسى 58 پايىزعا دەيىن جەتەدى»، - دەدى ۇكىمەت باسشىسى.
ا. ءماميننىڭ ايتۋىنشا، باعدارلاما باعىتتارى بويىنشا ينۆەستيتسيا كولەمى 2 تريلليون تەڭگەنى قۇرايتىن بولادى. ونىڭ 70 پايىزى - جەكەمەنشىك ينۆەستيتسيا. 200 مىڭنان استام جاڭا جۇمىس ورنى اشىلادى. ونىڭ ىشىندە 72 مىڭ تۇراقتى جۇمىس ورنىن قۇرۋ كوزدەلگەن.
«تۋريستەر سانى 2025 -جىلعا قاراي جىل سايىن 7 ميلليوننان 15 ميللونعا دەيىن جەتكىزىلەدى. تۋريزم سالاسى قازاقستان ەكونوميكاسى دامۋىنىڭ درايۆەرىنە اينالۋى كەرەك. بارلىق مۇمكىنشىلىك بار»، - دەدى ول.
ال ق ر پرەمەر- ءمينيستردىڭ ءبىرىنشى ورىنباسارى - قارجى ءمينيسترى ءاليحان سمايىلوۆ مادەنيەت جانە سپورت مينيسترلىگى وكىلەتتى ورگان رەتىندە مەملەكەتتىك بيۋدجەتتەن شىعىستاردى قاجەت ەتەتىن بارلىق باعىتتار مەن ءىس- شارالاردى مەملەكەتتىك ورگاندارمەن جانە جەرگىلىكتى اتقارۋشى ورگاندارمەن پىسىقتاۋى قاجەتتىگىن ەسكە سالدى.
«سونىڭ ناتيجەسىندە قارجىلاندىرۋ كوزدەرى بويىنشا جيىنتىق اقپاراتتى قالىپتاستىرىپ، قارجى مينيسترلىگىنە ءتيىستى ەسەپتەۋلەر مەن نەگىزدەمەلەردى ۇسىنۋى قاجەت»، - دەدى ءا. سمايىلوۆ.
اۆتور: مارلان جيەمباي
