ديزاينەرلەر كونكۋرسى: 2 ميلليون كىمگە بۇيىرادى

بايقاۋدىڭ گران-پري يەگەرى 2 ميلليون تەڭگە اقشالاي سىياقىعا يە بولادى.

ەسكە سالا كەتسەك، «قازاقپارات» اگەنتتىگى «رۋحاني جاڭعىرۋ» باعدارلاماسىن حالىق اراسىندا كەڭىنەن ناسيحاتتاپ، مادەني-رۋحاني قۇندىلىقتارعا بەتبۇرىس جاساۋ، سونداي-اق ەلباسى باستاماسىنىڭ تانىمالدىلىعىن ارتتىرۋ ماقساتىندا ۇزدىك ديزاينەرلىك بەزەندىرۋ كونكۋرسىن جاريالاعان ەدى.

رەسپۋبليكالىق كونكۋرس ناتيجەسىندە ۇزدىك دەپ تانىلعان تۋىندى (گرافيكالىق يلليۋستراتسيالار) «رۋحاني جاڭعىرۋ» تاقىرىبىنداعى ءتۇرلى دەكوراتسيالارعا، باسپا ونىمدەرىنە، كيىمدەرگە جانە تاعى باسقالارعا قولدانىلاتىن بولادى. سوندىقتان دا، ديزاينەرلىك يدەيالار نەگىزىنەن «رۋحاني جاڭعىرۋ» باعدارلامالىق ماقالاسىنداعى قۇندىلىقتارعا، اتاپ ايتقاندا، «باسەكەلىك قابىلەت»، «پراگماتيزم»، «ۇلتتىق بىرەگەيلىكتى ساقتاۋ»، «ءبىلىمنىڭ سالتانات قۇرۋى»، «قازاقستاننىڭ ريەۆوليۋتسيالىق ەمەس، ەۆوليۋتسيالىق دامۋى»، «سانانىڭ اشىقتىعى» سەكىلدى التى باعىتقا ساي بولۋى شارت.

ءاربىر قاتىسۋشى نەمەسە ۇجىم اتالعان 6 باعىتتىڭ ءارقايسىسىنا تەك 1 عانا جۇمىسىن ۇسىنا الادى.

اتاپ وتەيىك، كونكۋرس ماتەريالدارى 1- قاراشادان جەلتوقسان ايىنىڭ 15 ىنە دەيىنگى ارالىقتا قابىلدانادى. كونكۋرسقا قاتىسۋشىلار ءۇشىن جاس بويىنشا ەشقانداي شەكتەۋ قويىلمايدى. كونكۋرسقا قاتىسۋ ءۇشىن ەرەجەمەن تانىسۋى جانە قاتىسۋ تۋرالى ءوتىنىش فورماسىن تولتىرۋى ءتيىس.

قاتىسۋشىلاردىڭ جۇمىسىن ارنايى قۇرىلعان ءادىلقازىلار انىقتايدى، سونىمەن بىرگە «قازاقپارات» ح ا ا سايتىندا ونلاين-داۋىس بەرۋ جۇرگىزىلەدى. ءار نوميناتسيا بويىنشا جەڭىمپازدار ارنايى ديپلومدارمەن جانە اقشالاي سىياقىمەن ماراپاتتالادى. گران-پري يەسى 2 ميلليون تەڭگە بولاتىن اقشالاي سىياقىعا يە بولادى.

سونىمەن بىرگە، ۇزدىك دەپ تانىلعان تۋىندىلار بويىنشا: 1-ورىن - 1500000 تەڭگە، 2 ورىن - 1000000 تەڭگە، 3 ورىن - 500000 تەڭگە سىياقى بەلگىلەنىپ وتىر. بۇدان بولەك، ىنتالاندىرۋ سىيلىعى رەتىندە جالپى قورى 1000000 تەڭگەنى قۇرايتىن ارنايى جۇلدەلەر دە بار. سايكەسىنشە: 1-ارنايى جۇلدە - 400000 تەڭگە؛ 2-ارنايى جۇلدە - 400000 تەڭگە؛ 3-ارنايى جۇلدە - 200000 تەڭگە سىياقى الاتىن بولادى.

كونكۋرس جەڭىمپازدارىنىڭ تۋىندىلارى «قازاقپارات» ح ا ا سايتىندا ورنالاساتىن بولادى.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى