قازاقستاندا 2 ميلليوننان استام ادام تازا سۋعا جارىماي وتىر
بۇل تۋرالى بۇگىن ق ر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ ايتتى، دەپ حابارلايدى قازاقپارات.
حالىقتى اۋىز سۋمەن قامتاماسىز ەتۋ ماسەلەسىنىڭ ماڭىزدىلىعىنا سايكەس بۇل تاقىرىپ ۇكىمەتتىڭ، جەرگىلىكتى بيلىكتىڭ كۇن تارتىبىنەن تۇسكەن ەمەس. 2002-جىلى «اۋىز سۋ» باعدارلاماسى قابىلدانىپ، 2010-جىلعا دەيىن ىسكە اسىرىلدى.
ناتيجەسىندە 3417 اۋىلدىق ەلدى مەكەندەردى نەمەسە 3,9 ميلليون حالىقتى اۋىز سۋمەن قامتاماسىز ەتۋگە جاعداي جاسالىندى.
تاسىمالدى سۋدى پايدالاناتىن تۇرعىنداردىڭ سانى 445 مىڭ ادامنان 123 مىڭ ادامعا نەمەسە 3,5 ەسە ازايدى. 2011-جىلى «اق بۇلاق» باعدارلاماسى قابىلداندى، ال 2015-جىلدان باستاپ «2020-جىلعا دەيىن وڭىرلەردى دامىتۋ» باعدارلاماسىنىڭ اياسىندا اۋىز سۋ جوباسى ىسكە اسىرىلۋدا»، - دەدى مينيستر ەلىمىزدىڭ ەلدى مەكەندەرىن ساپالى اۋىز سۋمەن قامتاماسىز ەتۋدىڭ وزەكتى ماسەلەلەرىنە ارنالعان پارلامەنتتىك تىڭداۋ بارىسىندا.
ونىڭ دەرەگىنشە، سوڭعى 15 جىلدا اتقارىلعان جۇمىستىڭ قورىتىندىسى بويىنشا ۇستىمىزدەگى جىلدىڭ قىركۇيەك ايىنا اۋىلدى ەلدى مەكەندەردەگى حالىقتىڭ 80,3 پايىزى نەمەسە 6,2 ميلليون ادام، قالا تۇرعىندارىنىڭ 92,9 پايىزى نەمەسە 9,5 ميلليون ادام، جالپى رەسپۋبليكا حالقىنىڭ 87,5 پايىزى نەمەسە 15,7 ميلليون ادام اۋىز سۋمەن قامتىلىپ وتىر.
«سۋ كودەكسىنە» سايكەس اۋىل شارۋاشىلىعى مينيسترلىگى ەلدى مەكەندەرگە دەيىن توپتىق سۋ قۇبىرلارىن سالۋدى جانە جاڭارتۋدى، ال ينۆەستيتسيا جانە دامۋ مينيسترلىگى ەلدى مەكەندەردىڭ ىشىندە جەلىلەردى سالۋدى جانە جاڭارتۋدى جۇرگىزەتىندىگى بەلگىلى.
وسىعان سايكەس، قازىرگى كەزدە مينيسترلىككە قارايتىن «قازسۋشار» رەسپۋبليكالىق كاسىپورنىنىڭ تەڭگەرىمىندە جالپى ۇزىندىعى 10 مىڭ شاقىرىمنان اسا 30 توپتىق سۋ قۇبىرى بار. بۇل 497 اۋىلدى ەلدى مەكەندەردى جانە ول جەردەگى 1 ميلليوننان اسا حالىقتى قامتىپ وتىر. ونىڭ ىشىندە 156 اۋىلدىق ەلدى مەكەندەرگە تۇتىنۋشىعا دەيىن «قازسۋشار» قىزمەت كورسەتەدى، ال قالعان 341 ەلدى مەكەندەرگە اكىمدىكتەردىڭ كوممۋنالدىق كاسىپورىندارى قىزمەت كورسەتەدى»، - دەدى اسقار مىرزاحمەتوۆ.
ءمينيستردىڭ ايتۋىنشا، «اق بۇلاق» جانە «وڭىرلەردى دامىتۋ» باعدارلامالارى اياسىندا، ياعني 2011-2016-جىلدارى توپتىق سۋ قۇبىرلارىن سالۋ جانە جاڭارتۋعا 59 ميلليارد تەڭگە قاراجات بولىنگەن. ناتيجەسىندە 45 نىسان پايدالانۋعا بەرىلدى.
«اعىمداعى جىلى توپتىق سۋ قۇبىرلارى بويىنشا 17 جوباعا 12 ميلليارد تەڭگە ءبولىندى. ونىڭ ىشىندە 7 جوبا اياقتالاتىن بولادى، ال قالعاندارى جوسپارعا سايكەس كەلەسى جىلعا وتپەلى. ناتيجەسىندە 50 اۋىلدىق ەلدى مەكەندەردەگى 77 مىڭ حالىقتى سۋمەن جابدىقتاۋ جاقسارتىلادى»، - دەدى ول.
