اقتوبەلىكتەر قىتايدان كەلەتىن 2 مىڭ تۋريستى ءالى كۇتىپ وتىر

اقتوبەلىكتەر قىتايلىقتاردى ءالى كۇتىپ ءجۇر، دەپ حابارلايدى قازاقپارات ءتىلشىسى.

«ەكسپو-2017» حالىقارالىق كورمەسى اياسىندا اقتوبە قالاسىنا تۋريستەردىڭ كەلەتىنى تۋرالى ديماش قۇدايبەرگەننىڭ اناسى سۆەتلانا ايتبايەۆا وبلىستىق ءماسليحات سەسسياسىندا ءمالىم ەتكەن بولاتىن.

سول كەزدە جەرگىلىكتى دەپۋتات ديماشتىڭ اناسىنىڭ قولىنان تۋريستەرگە شاي بەرۋ ۇسىنىسىن ايتتى. اقتوبە وبلىستىق سىرتقى بايلانىستار جانە تۋريزم باسقارماسىنىڭ باسشىسى ەرمەك كەنجەحان ۇلى وڭىرگە 2 مىڭ قىتايلىق كەلەتىنىن، ديماشقا ارناپ ارنايى تۋريستىك باعدار ازىرلەنگەنىن جەتكىزدى. الايدا ارادا ءبىر اي ۋاقىت وتكەنىمەن، قىتايلىق تۋريستەردەن حابار جوق. «ءالى حابار جوق، كۇتىپ وتىرمىز»، - دەدى اقتوبە وبلىستىق سىرتقى بايلانىستار جانە تۋريزم باسقارماسىنىڭ باسشىسى ەرمەك كەنجەحان ۇلى.

نەگىزگى تۋريستىك مارشرۋتتى دايىنداعان «زەرە تۋر» كومپانياسىنىڭ ديرەكتورى بوتاگوز كرامبايەۆانىڭ ايتۋىنشا، ولار ءانشى ديماش قۇدايبەرگەن ءبىلىم العان مەكتەبىن، مۋزىكالىق كوللەدجىن قىتايلىقتار تاماشالايتىن ورىندار قاتارىنا ەنگىزگەن.

«تۋريستىك مارشرۋتتى دايىنداپ، قىتايلىقتاردى قابىلداۋعا ءازىر وتىرمىز. ءبىراق ولاردان حابار جوق. الدىمەن شىلدە ايىندا دەدى، كەيىن تامىز ايىندا دەپ ايتتى. انىعىن ەشكىم بىلمەيدى»، - دەدى ول.

اۆتور: التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى