شىلدەدەن باستاپ 2 ميلليوننان استام ادامنىڭ زەينەتاقىسى وسەدى - دۇيسەنوۆا

بۇل تۋرالى بۇگىن ۇكىمەت وتىرىسىندا ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءمالىم ەتتى، دەپ حابارلايدى قازاقپارات.

«ەلباسىنىڭ بەرگەن تاپسىرماسىنا سايكەس، 2017-2018-جىلدارى رەسپۋبليكالىق بيۋدجەتتەن تولەنەتىن زەينەتاقى مولشەرى كەزەڭ-كەزەڭمەن ارتاتىن بولادى. سونىمەن بىرگە بيىلدان باستاپ بالالارعا بەرىلەتىن جاردەماقى دا وسكەلى وتىر. وسىعان وراي نازارلارىڭىزعا ۇسىنىلىپ وتىرعان زاڭ جوباسىندا ءبىرقاتار وزگەرىستەر ەنگىزۋ كوزدەلۋدە. بۇل رەتتە، 2017-جىلعى 1- شىلدەدەن باستاپ ىنتىماقتى زەينەتاقى مولشەرى جىلدىڭ باسىندا ارتقان 9 پايىزدى ەسكەرگەندە، قوسىمشا 11 پايىزعا، ال بازالىق زەينەتاقى مولشەرى جىلدىڭ باسىندا ارتقان 7 پايىزدى ەسكەرگەندە، قوسىمشا 13 پايىزعا ۇلعايتىلماق. ناتيجەسىندە، 2016-جىلمەن سالىستىرعاندا، زەينەتاقى كولەمىن 2017-جىلعى 1- شىلدەدەن باستاپ 20 پايىزعا دەيىن ارتتىرۋدى قامتاماسىز ەتەمىز. وسى ورايدا 2 ميلليوننان استام ادام قامتىلادى»، - دەپ اتاپ ءوتتى دۇيسەنوۆا.

ونىڭ سوزىنە قاراعاندا، بۇل باعىتتا ورتاشا زەينەتاقى مولشەرى 2017-جىلعى 1- قاڭتاردان 60167 تەڭگە بولسا، ال 1- شىلدەدەن 67 مىڭ 41 تەڭگەنى قۇرايدى، ياعني 7 مىڭ تەڭگەگە وسەدى. بۇدان بولەك مينيستر 2018-جىلدىڭ 1- شىلدەسىنەن باستاپ بازالىق زەينەتاقىنى تاعايىنداۋ ادىستەمەسى وزگەرەتىنىن جەتكىزدى. جاڭا تاسىلگە ساي، ول زەينەتاقى جۇيەسىنە قاتىسۋ وتىلىنە بايلانىستى تاعايىندالادى. الداعى جىلدىڭ شىلدەسىنەن زەينەتاقىنىڭ ورتاشا مولشەرى (بازالىق زەينەتاقىنى ەسەپتەگەندە) 2016-جىلعا قاراعاندا %45 عا وسەدى دەپ كۇتىلۋدە.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى