رەسەيدىڭ مادەنيەت ءمينيسترى قازاقستاننىڭ 2 - دارەجەلى «دوستىق» وردەنىمەن ماراپاتتالدى
كەزدەسۋ بارىسىندا ءابدىقالىقوۆا قازاقستان مەن رەسەي اراسىنداعى قارىم- قاتىناس ساۋدا- ەكونوميكالىق، ساياسات سىندى بارلىق سالادا، ونىڭ ىشىندە مادەني- گۋمانيتارلىق باعىتتا دا قارقىندى دامىپ كەلە جاتقاندىعىن باسا ايتتى.
«ەڭ الدىمەن ق ر پرەزيدەنتى نۇرسۇلتان ءابىش ۇلى نازاربايەۆتىڭ تاپسىرماسىمەن جاقسى ءبىر ميسسيانى ورىنداپ، سىزگە ەكى ەلدىڭ اراسىنداعى بەيبىتشىلىك، دوستىق پەن ىنتىماقتاستىقتى نىعايتۋعا سىڭىرگەن ەڭبەگىڭىز ءۇشىن Ⅱدارەجەلى «دوستىق» وردەنىن تابىستاعىم كەلىپ وتىر»، - دەدى مەملەكەتتىك حاتشى.
ءوز كەزەگىندە رەسەيدىڭ مادەنيەت ءمينيسترى قازاقستاننىڭ Ⅱدارەجەلى «دوستىق» وردەنىمەن ماراپاتتالۋىن زور قۇرمەت دەپ باعالايتىندىعىن ايرىقشا اتاپ ءوتتى.
«ەڭ الدىمەن ق ر پرەزيدەنتىنە العىسىمدى بىلدىرەمىن. بۇل جەكە مەنىڭ عانا ەمەس، بۇكىل رەسەيدىڭ مادەني قىزمەتكەرلەرىنە بەرىلىپ وتىرعان باعا. ولار قازاقستانعا، استاناعا زور قۇلشىنىسپەن كەلەدى. ويتكەنى، بۇل ەل ءبىزدىڭ جاقىن كورشىمىز، باۋىرلاس حالقىمىز»، - دەدى رەسەيدىڭ مادەنيەت ءمينيسترى.
كەزدەسۋ سوڭىندا ق ر مەملەكەتتىك حاتشىسى گۇلشارا ءابدىقالىقوۆا رەسەيدىڭ مادەنيەت مينيسترىنە زور دەنساۋلىق، يگىلىك جانە ەكى ەل اراسىنداعى مادەني- گۋمانيتارلىق بايلانىستاردى دامىتۋداعى ەڭبەگىنە تابىس تىلەدى.
اۆتور: مارلان جيەمباي
