ماڭعىستاۋدا شامامەن 2 مىڭ اقبوكەن قالدى
9 جىلدان كەيىن ماڭعىستاۋ وبلىسىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىلىعى 2015-2017 - جىلدارعا ارنالعان مونيتورينگتىڭ ەكىنشى كەزەڭىن وتكىزۋ باستاماسىن كوتەردى.
«ادامداردىڭ انتروپوگەندىك ارەكەتى سالدارىنان كەي جانۋارلارعا جويىلۋ قاۋپى ءتونىپ تۇر. ماسەلەن، جۇپ تۇياقتىلار. 1991 - جىلى ماڭعىستاۋ وبلىسىندا 230-240 مىڭ باس كيىك بولعان، ال 2006-2008 - جىلدارى مونيتورينگ پوپۋلياتسيانىڭ، 10,4 مىڭ باسقا 22,6 ەسەگە ازايعانىن كورسەتتى. وبلىستاعى ورمان جانە اڭشىلىق شارۋاشىلىعى ينسپەكتسياسىنىڭ مالىمەتىنشە، قازىر اقبوكەن سانى 2 مىڭ. 1991 - جىلى 5,8 مىڭ ارقار بولسا، قازىر ولاردىڭ سانى مىڭنان از. ولاردىڭ سانى 8 ەسەگە كەمىدى. شامامەن 1,5 مىڭ قاراقۇيرىق بار. بۇلار دا 1,7 ەسەگە ازايدى»، - دەدى ماڭعىستاۋ وبلىسىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسى باسشىسىنىڭ ورىنباسارى ورىنباسار توقجانوۆ.
ماسەلەنى شەشۋ ءۇشىن براكونەرلىكپەن كۇرەس كۇشەيتىلدى، جەرگىلىكتى ماڭىزداعى ءۇش كەشەندى قورىق قۇرىلدى. ولار: «كولەڭكەلى»، «ەسەت»، «ماناشى». ولار بەينەۋ جانە ماڭعىستاۋ اۋداندارىندا ورنالاسقان. جالپى اۋماعى 433 مىڭ 740 گەكتاردى قۇرايدى.
«كىشى قورىقشالار شارۋاشىلىق قىزمەتىن جۇرگىزۋگە جارامسىز جەردە قۇرىلدى. الايدا وندا كوپتەگەن جابايى حايۋاناتتار بار. 2 جىلدا بۇل اۋماقتا 473 رەيد جۇرگىزىلدى، 200 دەن استام اۆتوموبيل توقتاتىلدى»، - دەپ اتاپ ءوتتى و. توقجانوۆ.
قازىر وبلىستا ورمان مەن جانۋارلار الەمىن قورعاۋ بويىنشا 2 مەملەكەتتىك مەكەمە بار. ولاردىڭ جالپى اۋماعى 242,361 گەكتار. و. توقجانوۆتىڭ ايتۋىنشا، كەلەسى جىلدان بوزاشى جارتىلاي ارالىندا ءۇشىنشى ورمان شارۋاشىلىعىن قۇرۋ بويىنشا جۇمىس باستالادى.
