شەت ەلدەردە شامامەن 2 مىڭعا جۋىق قازاقستان ازاماتى سوتتالىپ، جازاسىن وتەۋدە - ي. مەركەل

اتالعان كەلىسىم ۋاعدالاسۋشى تاراپتاردىڭ ازاماتتارىن وزدەرى ازاماتى بولىپ تابىلاتىن مەملەكەتتە جازاسىن ودان ءارى وتەۋ ءۇشىن بەرۋ ماسەلەلەرىن رەتتەۋگە باعىتتالادى.

سونىڭ ىشىندە تۇلعالاردى بەرۋدە ول سول ەلدىڭ ازاماتى بولۋى جانە وعان جاسالعان ۇكىم ناقتى كۇشىنە ەنگەن بولۋى شارت. ەگەر ۋاعدالاسۋشى تاراپتاردىڭ ءبىرى ونداي ۇستاپ بەرۋ ەل ەگەمەندىگىنە، قاۋىپسىزدىگىنە، قوعامدىق تارتىپكە زالالىن تيگىزەدى دەپ سانايتىن بولسا، وندا ۇستاپ بەرۋدەن باس تارتىلۋى مۇمكىن.

«شەت ەلدەردە مەنىڭ بىلۋىمشە، اعىمداعى جىلدىڭ 1 - قاڭتارىنداعى جاعدايعا سايكەس، شامامەن 2 مىڭعا جۋىق قازاقستاننىڭ ازاماتى سوتتالعان بولاتىن. ناقتىراق ايتقاندا، ەگەر جاڭىلماسام، 1995 ادام. ال وسى شەت ەلدەردە سوتتالعان قازاقستان ازاماتىن قايتارۋعا كەلسەك، ول وتە كۇردەلى ۇدەرىس. كوپتەگەن ەلدەر بۇعان بارا بەرمەيدى.

ماسەلەن، رەسەيمەن بىزدە جەڭىلىرەك بولعانىمەن، وزبەكستان، قىرعىزستان بويىنشا قايتارۋعا قاتىستى كۇردەلى جاعدايلار بارشىلىق. ءبىز وتكەن اپتادا بۇل ماسەلەنى جوعارى دەڭگەيدە شەشۋ ءۇشىن وزبەكستان تاراپىنا حات جولدادىق. تۇتاستاي العاندا، شەت ەلدەردە سوتتالعان 25 قازاقستاندىق قايتارىلعان بولاتىن. سونىمەن قوسا، ءبىر پسيحيكالىق اۋرۋعا شالدىققان ازامات تا ەلگە اكەلىندى»، - دەدى ق ر باس پروكۋرورىنىڭ ءبىرىنشى ورىنباسارى يوگان مەركەل.

بۇل رەتتە ي. مەركەل سوتتالۋشى تۇلعانىڭ قازاقستانعا قايتارىلۋىنا كەلىسىمى دە ماڭىزدى ءرول اتقاراتىنىن اتاپ ءوتتى.

«ەگەر ول ەلدە جازاسىن وتەۋدى جالعاستىرۋعا كەلىسىمىن بەرمەسە، ءبىزدىڭ قولىمىزدان دا ەشتەڭە كەلمەيدى»، - دەدى ي. مەركەل.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى