ليۆان مەن يزرايل شەكاراسىنداعى اتىستان 2 ەۆرەي ساربازى قازا تاپتى
ليۆان جاۋىنگەرلەرى شەكارا بويىنداعى اسكەري دجيپتى اتقىلاپ، 2 ەۆرەي ساربازى قازا تاۋىپ، تاعى جەتەۋى جاراقات الدى.
بۇل تۋرالى يزرايل قورعانىس اسكەرىنىڭ باسپا ءسوز قىزمەتى حابارلادى.
ال بۇل قانتوگىستى «حەزبوللا» ۇيىمى ءوز موينىنا الدى. اراب اقپارات قۇرالدارىنىڭ حابارلاۋىنشا، بۇل جاقىندا جۇرگىزىلگەن يزرايل وپەراتسياسى مەن كوشباسشىلارىنىڭ ءبىرىنىڭ ءولىمى ءۇشىن كەك قايتارۋ ەكەن.
قازىر ەۆرەي ەلىنىڭ اسكەري-اۋە كۇشتەرى ليۆاننىڭ وڭتۇستىگىندەگى نىسانداردى بومبالاۋدا. اۋە شابۋىلىنان ب ۇ ۇ-نىڭ ءبىر بىتىمگەرى قازا تاپتى. يزرايل پرەمەر-ءمينيسترى بينيامين نەتانياحۋ قاۋىپسىزدىك قىزمەتىنىڭ شۇعىل وتىرىسىن وتكىزدى. ەلدىڭ سولتۇستىك بولىگىنە كىرۋگە جانە جەرگىلىكتى حالىققا سىرتقا شىعۋعا تىيىم سالىنعان.
ال وقۋشىلاردى مەكتەپكە بروندى تەحنيكامەن تاسىمالداۋدا.
بينيامين نەتانياحۋ، يزرايل پرەمەر- ءمينيسترى:
- قازىر وسى ساتتە ءبىزدىڭ اسكەر جاۋاپ سوققى جاساپ جاتىر. ءبىزدىڭ سولتۇستىك شەكارامىزعا قاۋىپ توندىرگىسى كەلگەندەرگە گازا سەكتورىندا نە بولىپ جاتقانىنا نازار اۋدارسىن دەگىم كەلەدى. وتكەن جازدا حاماس قۇرىلعان كەزىنەن ەڭ اۋىر سوققىعا ۇشىرادى. ءبىزدىڭ اسكەر قۋات-قارىمىن ەلىمىزدىڭ كەز كەلگەن جەرىندە كورسەتۋگە دايىن.
www.24.kz
