ا ن-2 ۇشاعى اپاتىنان ءتىرى قالعان قىز وقيعانىڭ قالاي بولعانىن ايتىپ بەردى

تىلگە كەلگەن ول سۇمدىق اپاتتى اكە-شەشەسىنە تولىق بايانداپتى دەپ حابارلايدى ك ت ك ارناسى.

ايتۋىنشا، ۇشاق قۇلاعاندا قاردىڭ استىنا كومىلىپ قالعان ەكەن. سوعان قاراماستان كۇلدىڭ اراسىنان ۇشقىشتىڭ تەلەفونىن تاۋىپ قۇتقارۋشىلارعا حابار بەرىپ ۇلگەرگەن. ايدالادا ۇسكىرىك ايازدا قاتتى توڭعاندىقتان ارىپتەستەرىنىڭ ءولى دەنەسىن قۇشاقتاپ جىلىنىپ وتىرىپتى.

ايتقانداي، ولاردىڭ قازا تاپقانىن اسەمگە ءالى ەستىرتپەگەن. ال زارداپ شەگۋشى شۋدان استاناعا جەتكىزىلدى. بورانعا بايلانىستى شۋ قالاسىنا اسقان قيىندىقپەن جەتكەن دارىگەرلەر توبى اسەم شاياحمەتوۆانى سانيتارلىق اۆياتسياعا وتىرۋعا ازەر كوندىرىپتى. سەبەبى قاتتى قورقىپ قالعان. ايتەۋىر، كەلىسىمىن الىپ تاڭدا تىكۇشاقپەن استاناداعى اۋرۋحاناعا جەتكىزدى.

ەلوردانىڭ ەڭ تاڭداۋلى اق حالاتتىلارى ميى شايقالىپ، اۋىر جاراقاتتار الىپ، سان سۇيەكتەرى سىنعان اسەمگە العاشقى وپەراتسيا جاساپ ۇلگەردى.

«اشىق سىنىق بولعان سول جاق سان سۇيەگى مەن وڭ جاق سيراق سۇيەگىنە حيرۋرگيالىق وڭدەۋ وپەراتسياسى جاسالدى. سىنعان سۇيەكتەرىن جيناپ، مەتاللوكونسترۋكتسيامەن بەكىتۋ وپەراتسياسى دا جاسالادى. گيپسسىز. گيپس سالىنبايدى. جاڭا تەحنولوگيا بويىنشا جاسالاتىن وپەراتسيالار»، - دەيدى استانا قالالىق 1№ اۋرۋحانانىڭ تراۆماتولوگى نۇرجان ەستەمەسوۆ.

«قارعا كومىلگەن اسەم اياعى سىنىق بولسا دا، ونى ءوزى قازىپ شىققان. ال قۇتقارۋشىلارعا حابارلاسسا، «داۋسىڭىز ەستىلمەيدى» «الىستاماڭىز» دەپ ايتقان. ايتەۋىر قۇتقارۋشىلار اسەمدى ۇيالى تەلەفون ارقىلى تاپقان. ايتپەسە، قاراڭعىدا دالادا قالار ەدى. ابدەن توڭعان. جانىنداعى ارىپتەستەرىنىڭ ولگەنىن بىلمەگەن. ءبىرىنىڭ جىلى دەنەسىن ءتىرى دەپ ويلاپ قۇشاقتاپ وتىرعان. تاپقان سوڭ ۇشاقتىڭ قاناتىنا وتىرعىزعان. الىپ كەتپەك بولعانىمەن جول بولماي قۇتقارۋشىلار ءبىراز قينالعان»، - دەيدى اسەم شاياحمەتوۆانىڭ اكەسى ءامىرحان كاكوكوۆ.

كوڭىلى الاڭ اتا-انا كورەر جارىعى بار باۋىر ەتى بالاسىنىڭ كىشكەنتايىن وتە وجەت بوپ وسكەنىن ايتادى. ەڭبەكتەن قاشپاعان ول كاتونقاراعاي اۋدانىندا تۇرسا دا، باسقا قالاعا بارىپ جۇمىس ىستەۋدەن قاشپايتىن ەدى دەيدى اناسى. ەندى ەكى بالانىڭ كىشىسى تۇرمىس قۇرىپ ۇلگەرمەگەن جالعىز قىزدارى اسەمگە ەم قونىپ، اياعىنا تىك تۇرىپ كەتۋىن تىلەپ قانا وتىر.

ال ا ن-2 اپاتىنان قازا تاپقان 3 ۇشقىش پەن «قازاقمىس» كورپوراتسياسىنىڭ تەحنيكالىق دەپارتامەنتى ديرەكتورى عابيت تولەۋبايەۆتىڭ دەنەلەرى قاراعاندىعا اكەلىندى. ال باس مەحانيك ەربول ىبىرايەۆ پەن «بالقاش ءتۇستى مەتتىڭ» ءبولىم باستىعى ۇلبازار ەسماعامبەتوۆانىڭ مايىتتەرى قىزىلوردا مەن جەزقازعان قالالارىنا جونەلتىلگەن.

ال اپاتتان جالعىز ءتىرى قالعان اسەم شاياحمەتوۆانى استانادا ءالى بىرنەشە وپەراتسيا كۇتىپ تۇر. زارداپ شەگۋشى اتا-اناسىنا سونداي-اق، ۇشاقتىڭ تۇماننان اداسىپ بارىپ قۇلاعانىن ايتىپتى. ال 6 ادامنىڭ ءومىرىن قيعان ا ن-2 ءنى «قازاق مىس» كورپوراتسياسىنا جالعا بەرگەن قاراعاندىداعى «وليمپ ەير» كومپانياسىن قازىر پروكۋرورلار تەرگەپ جاتىر. ازىرشە، قىلمىستىق ءىس دەرەك بويىنشا قوزعالعان.

«ك ت ك ارناسى»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى