ۇلكەن ەكرانعا قايتا ورالعان «رەكەتير-2» فيلمىنىڭ باستى كەيىپكەرلەرى قۇپياسىن اشتى

جەتى جىلدىق ۇزىلىستەن سوڭ رەجيسەرلەر جۇرت جاقسى قابىلداعان تۋىندىنىڭ جالعاسىن تۇسىرۋگە بەل بۋىپ، بىلەك سىبانا جۇمىسقا كىرىسىپ كەتتى.

«ساتاي فيلم» كينوستۋدياسى بۇل كارتينادا بۇرىننان تانىس كەيىپكەرلەردىڭ ءومىرى قالاي وربىگەنىن بايانداپ، جاڭا تۇلعالاردىڭ ارەكەتتەرىن كورسەتپەك.

رەجيسەردىڭ سوڭعى نۇسقاۋىنان سوڭ اسەل ساعاتوۆا مەن سايات يسەمبايەۆ بۇگىنگى ءتۇسىرىلىمدى باستاپ كەتتى. فيلمنىڭ ءبىرىنشى بولىمىندە كوپشىلىككە وجەت جىگىت رەتىندە تانىس سايان «رەكەتير-2: ەسە قايتارۋ» تۋىندىسىندا كورەرمەنگە باسقا قىرىنان كورسەتىلمەك.

سايات يسەمبايەۆ، اكتەر:

- فيلمنىڭ ۇناۋى نەمەسە ۇناماۋى كورەرمەننىڭ تالعامىنا بايلانىستى. ءبىرىنشى بولىمدە ءبىز 90- جىلدارداعى اتىس-شابىستى كورسەتسەك، قازىرگى سايان وزگەرىسكە ۇشىراعان. ەڭ قيىنى وسى كەيىپكەردى باسقا قىرىنان كورسەتۋدە.

سايات يسەمبايەۆتان وزگە ارۋجان جازىلبەكوۆا، فارحات ءابدىرايىموۆ، جان بايجانبايەۆ پەن ازامات ساتىبالدى سىندى قازىرگى قازاق كينوسىنىڭ بەلدى اكتەرلەرى ءتۇسىرۋ جۇمىستارىنا قاتىسۋدا. ال تەك كينودا عانا ەمەس، شىنايى ومىردە دە انا اتانىپ ۇلگەرگەن اسەل ساعاتوۆامەن بىرگە ونىڭ التى ايلىق ۇلى الدياردى دا كورۋگە بولادى.

اسەل ساعاتوۆا، اكتريسا:

- مەنىڭ كەيىپكەرىمنىڭ مىنەزى جۇمساعىراق بولادى. بۇرىن ول تاڭداۋ جاساي الماي ۇنەمى وي ۇستىندە بولسا، ەندى ونىڭ ماقساتتارى بەلگىلى. انا وتباسىن باقىتتى ەتۋى ءتيىس، ال سۇيىكتى جارى وعان ءارقاشان كومەكتەسەدى.

دوستىق، ادالدىق پەن ماحابباتقا ءار تۋىندىسىندا ءمان بەرەتىن «ساتاي فيلم» كينوستۋدياسى كەيىپكەرلەردىڭ بۇگىنگى ارەكەتى ەرتەڭگى كۇنىنە قالاي اسەر ەتەتىنىن كورسەتۋدى ماقسات ەتكەن. ال كارتيناداعى نەگىزگى كورىنىستەر قاراعاندى، شىمكەنت، استانا مەن الماتى قالالارىن قامتيدى. «رەكەتير-2: ەسە قايتارۋ» فيلمىنىڭ ءتۇسىرۋ جۇمىستارى جىل سوڭىنا دەيىن اياقتالىپ، ۇلكەن ەكراندارعا 2015 -جىلدىڭ ناۋرىزىندا شىعادى دەپ كۇتىلۋدە.

ktk

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى