قازاقپارات ءتىلشىسى وڭتۇستىك كورەيادا 2 ايلىق تاعىلىمدامادان ءوتتى- فوتو
الەمنىڭ 10 ەلىنەن ىرىكتەلگەن جۋرناليستەردىڭ اراسىنان ءبىزدىڭ اگەنتتىك ءتىلشىسى جاسۇلان جولدىبايەۆ وسىناۋ قۇرمەتكە لايىق دەپ تانىلعان بولاتىن.
قىركۇيەك- قاراشا ايلارى ارالىعىندا وتكەن باعدارلاما بويىنشا قازاقستان، كامبودجا، ەفيوپيا، نەپال، فيليپپين، كەنيا، لاوس، موڭعوليا، ميانما، ۆەتنام مەملەكەتتەرىنىڭ ب ا ق وكىلدەرى اتالمىش ۇيىمنىڭ ارنايى سەرتيفيكاتتارىنا يە بولدى.
«Korea Press Foundation» ۇيىمى قىرۋار جۇمىس اتقاردى. ونىڭ قۇراستىرعان باعدارلاماسى ءبىز ءۇشىن وتە ءتيىمدى بولدى دەپ ەسەپتەيمىن. شارتاراپتان جينالعان 10 ءتىلشى تەوريالىق، پراكتيكالىق بىلىمدەرگە يە بولىپ، مادەني شارالارعا دا قاتىستى. ەكى ايدىڭ ىشىندە ءبىز وڭتۇستىك كورەيانىڭ بارلىق وڭىرلەرىن ارالاپ شىعىپ، «تاڭعى جۇپار ەلىنىڭ» وزىنە ءتان قاسيەتتەرىن، ۇلتتىق ءداستۇرىن، ءومىر سالتىن تانۋعا مۇمكىندىك الدىق. ەلدىڭ ەڭ بەدەلدى كورەيا ۋنيۆەرسيتەتىندە بىلىكتى پروفەسسورلاردىڭ دارىستەرىنە قاتىسىپ، كارىس ءتىلىن مەڭگەردىك، مادەنيەتى، ەستراداسىن، جۋرناليستيكاسى، جارناما يندۋسترياسى، ەكونوميكاسى، سايلاۋ جانە سىرتقى ساياساتتارى، كورەيانىڭ مەديا ورتاسى، IT سالاسى جايىندا كەڭ ماعلۇماتتار الدىق»، - دەدى ول.
ج. جولدىبايەۆتىڭ ايتۋىنشا، جۋرناليستەر دارىستەن تىس ۋاقىتتا سەۋلدەگى ۇلتتىق مۋزەيگە، كورەيانىڭ ۇلتتىق اۋىلىنا، ۇلتتىق Gugak ورتالىعىنا (كورەيانىڭ ءداستۇرلى اندەرىنىڭ ورتالىعى) ، سۋۆونداعى Samsung Electronics Co. كومپانياسىنا، يانگۋداعى Eulji وبسەرۆاتورياسىنا، سونىمەن قاتار KBS جانە چوسون تەلەحابار تاراتۋ كومپانيالارىنا، پرەزيدەنتتىك رەزيدەنسياعا، سىرتقى ىستەر، ەڭبەك جانە جۇمىسپەن قامتۋ مينيسترلىكتەرىنە بارىپ، جۇمىستارىمەن، كورەي مادەنيەتىمەن جان- جاقتى تانىسقان.
«كورىپ وتىرعانىڭىزداي، باعدارلاما وتە تىعىز بولدى. دەگەنمەن بۇنىمەن شارالار جيىنتىعى اياقتالعان جوق. ەكى ايدىڭ ءبىر اپتاسىن كورەيانىڭ تانىمال Yonhap اقپارات اگەنتتىگىندە وتكىزىپ، جۋرناليستەرىنىڭ جۇمىس ەرەكشەلىكتەرىمەن تانىستىم. ايتپاقشى، Yonhap پەن «قازاقپارات» اگەنتتىگى كوپ جىلداردان بەرى ارىپتەس بولىپ سانالادى. وسىدان بىرنەشە جىلدار بۇرىن قازاقستان جانە وڭتۇستىك كورەيا اگەنتتىكتەرى سەرىكتەستىك تۋرالى ەكىجاقتى كەلىسىمگە قول قويعان بولاتىن. سوندىقتان مەنى Yonhap اگەنتتىگىندە جىلى قارسى الدى جانە ارىپتەستىگىمىزدىڭ ودان ءارى كۇشەيۋىنە قاتىستى جاڭا جوبالاردى تالقىلاۋعا مۇمكىندىك الدىق»، - دەدى قازاقپارات ءتىلشىسى.
ونىڭ سوزىنە قاراعاندا، باعدارلامانىڭ سوڭعى كەزەڭدەرىندە جۋرناليستەر گەندجۋ، اندون، سەدجونگ پەن ۋلسان قالالارىن، سونداي- اق جەدجۋ ارالىن بەتكە الدى. گەندجۋ مەن اندون - كورەيانىڭ مادەني ءارى تاريحي بايلىعىنىڭ ساقتاۋشىسى بولسا، ۋلسان شاحارى Hyundai Motors جانە Hyundai Heavy Industries سياقتى وندىرىستەر ورنالاسقان ەلدىڭ يندۋستريالىق ولكەسى، ەكونوميكاسىنىڭ تىرەگى.
«كورەيا مەن ءۇشىن ۇلگى الاتىن ەلدىڭ ءبىرى بولىپ سانالادى. وزگە حالىقتار وسىناۋ ۇلتاراقتاي اۋماقتا ورىن تەپكەن ەڭبەكقور حالىقتان ونەگە الۋى ءتيىس. كورەيانى بۇگىنگى جەتىستىكتەرگە جەتەلەپ، بۇگىنگى زاماندا ەڭ الپاۋىت مەملەكەتتەردىڭ قاتارىنا قوسقان - ول ونىڭ حالقى. ولار ءوز ءداستۇرىن شىن سىيلايدى، تارتىپكە كوپ ءمان بەرەدى، باستىسى، ءوز مەملەكەتىن قاتتى سۇيەدى. كارىستەر - قىتاي جانە جاپونيا تاۋارلارىنىڭ ەكسپانسياسىن جەڭە بىلگەن از ەلدەردىڭ ءبىرى. سەبەبى حالىق تەك كورەيالىق تاۋارلاردى تۇتىنۋدى مىندەت سانايدى، پاتريوتتىقتىڭ بەلگىسى دەپ ەسەپتەيدى»، - دەدى ول.
اۆتور: مارلان جيەمباي
