ۇلى بريتانيا ەۋرو وداقتىڭ ورتاق قازىناسىنا 2 ميلليارد ەۋرو تولەۋدەن باس تارتىپ وتىر
اتاپ ءوتۋ كەرەك، البيون جىل سايىن ورتاق قازىناعا 17 ميلليارد ەۋرو تولەپ تۇرادى. بۇل سومانىڭ تەك جارتىسى عانا ەلگە ينۆەستيتسيالىق تابىس رەتىندە قايتارىلادى.
ەۋروكوميسسيا بولسا، بريتانيانىڭ تابىسى كوبەيگەندىكتەن، سالىم دا جوعارىلايدى دەپ ءتۇسىندىرىپ وتىر. لوندون مەن بريۋسسەل اراسىنداعى شيەلەنىس شىرقاۋ شەگىنە جەتكەنگە ۇقسايدى. ەۋرووداقتىڭ سوڭعى وتىرىسىندا ءسوز العان بريتانيا ۇكىمەت باسشىسى كامەرون، ءوز ىزاسىن جاسىرا المادى. ول بريۋسسەلدىك بيۋروكراتتاردى ار- ۇياتتان جۇرداي دەپ جايىپ سالدى.
دەۆيد كامەرون، ۇلىبريتانيا پرەمەر- ءمينيسترى:
- بۇعان دەيىن ەشقاشان كۇتپەگەن جەردەن وسىلايشا 2 ميلليارد ەۋرونى جۇكتەي سالۋ جاعدايى بولماعان ەدى. بۇل بارىپ تۇرعان باسسىزدىق. مۇنداي سالىم جاساۋ ءبىز ءۇشىن مۇمكىن ەمەس. مەن بۇل شوتتى 1- جەلتوقسانعا دەيىن تولەمەيمىن. 2 ميلليارد ەۋرونى قازىنادان سۋىرىپ بەرۋ مەنىڭ ويىمدا دا جوق.
بريۋسەل بولسا ءوز مۇمكىندىكتەرىن جاقسى بىلەدى. قانشا بەت قاراتپاي تۇرعانىمەن، كەمەرون بۇل شوتتى جاپپاي، جايبىراقات جۇرە المايدى. ويتكەنى، ەۋروكوميسسيا باسشىسى بارروزۋنىڭ ءوزى «بريتانيا ەۋرووداق قۇرامىنا كىرگەننەن كەيىن ونىڭ بارلىق شارتتارىن قابىلداعانىن جانە ورىنداۋعا مىندەتتى ەكەنىن مالىمدەدى. تابىسىڭ كوبەيگەن سايىن، ورتاق قازىنا سالاتىن سالىمىن دا كوبيتەدى» دەدى ، ەۋروكوميسسيا باسشىسى. بۇل ءسوزدى باسقا مەملەكەت باسشىلارى دا قۇپتاپ وتىر.
انگەلا مەركەل گەرمانيا كانسلەرى:
- مەن بۇل سومانىڭ دۇرىس ەكەنىنە كۇماندانبايمىن. دەگەنمەن ناقتىلاۋ ارتىق ەتپەيدى. ال دەۆيد كەمەرون بولسا بۇل شوتتى تولەمەيمىن دەپ تۇرعان جوق، تەك تولەۋ مەرزىمىنىڭ تىم ەرتە ەكەنىنە الاڭداۋلى. بۇل ماسەلە ءوز شەشىمىن جاقىن ارادا تابادى دەپ سەنەمىن.
بۇل جونىندە قوعام پىكىرى دە سان ءتۇرلى. جۇرگىزىلگەن ساۋالناما قورىتىندىسى بويىنشا، بريتاندىقتاردىڭ تەڭ جارتىسى ەۋرووداق قۇرامىنان شىعۋدى قۇپ سانايدى.
www.24.kz
