قازاقستان جۇك تاسىمالىنان تۇسەتىن تابىستى 2 ميلليارد دوللارعا جەتكىزۋدى كوزدەپ وتىر

بۇل تۋرالى كەشە الماتىدا تەڭىزگە شىعۋ مۇمكىندىگى جوق ەلدەردىڭ ب ۇ ۇ جانىنداعى تۇراقتى وكىلدەرىنىڭ كوشپەلى كەڭەسى بارىسىندا ق ر كولىك جانە كوممۋنيكاتسيا مينيسترلىگىنىڭ جاۋاپتى حاتشىسى زامير ساعىنوۆ مالىمدەدى.

ونىڭ ايتۋىنشا، قازاقستاندا اۆتوكولىك جولدارىنا، تەمىر جول جەلىسىنە جانە اۋەجايلارعا ەرەكشە كوڭىل بولىنەدى.
 «قازىرگى تاڭدا ەلىمىزدە زاماناۋي كولىك جەلىسىن قالىپتاستىرۋ ساياساتى جۇرگىزىلۋدە. وزدەرىڭىز بىلەسىزدەر، ازيا مەن ەۋروپا ەلدەرى اراسىنداعى جۇك لەگى نەگىزىنەن تەڭىز جولدارى ارقىلى جۇزەگە اسادى. ال قۇرلىق ارقىلى جۇك تاسىمالىنىڭ كولەمى بۇل لەكتىڭ 0,2-0,5 پايىزىن عانا قۇرايدى. سوندىقتان ەلىمىز قىتاي مەن ەۋروپا اراسىنداعى جۇك لەگىنىڭ ءبىر بولىگىن قازاقستان ارقىلى وتەتىن ترانزيتتىك جۇك تاسىمالى جۇيەسىنە باعىتتاۋدى كوزدەپ وتىر.

باستى ماقسات - 2020 - جىلعا قاراي ترانزيتتىك تاسىمالدىڭ ۇلەسىن  جالپى جۇك تاسىمالىنىڭ 8 پايىزىنا دەيىن جەتكىزۋ. بۇل ىسكە اسىرىلعان جاعدايدا كولىكتىڭ بارلىق ءتۇرى بويىنشا جۇك تاسىمالىنىڭ كولەمى ەكى ەسەگە دەيىن ۇلعايىپ، تاسىمالداناتىن جۇكتەردىڭ جالپى سالماعى 30 ميلليون تونناعا جەتەتىن بولادى. وسىلايشا قازاقستان 2020 - جىلعا قاراي ترانزيتتەن تۇسەتىن تابىستىڭ كولەمىن 2 ميلليارد دوللارعا جەتكىزۋدى كوزدەۋدە.

سوڭعى 5 جىل ىشىندە ەلىمىزدە كولىك كوممۋنيكاتسياسى كەشەنىن دامىتۋعا 20 ميلليارد 300 ميلليون ا ق ش دوللارى جۇمسالدى. ەلىمىزدە كۇنى بۇگىنگە دەيىن 19 مىڭ شاقىرىمدىق اۆتوكولىك جولدارى مەن 1200 شاقىرىم تەمىر جول جەلىسى قالپىنا كەلتىرىلدى. 9 اۋەجاي قايتا جابدىقتالدى. ەۋرووداق ەلدەرىنە ۇشۋعا قاتىستى «ەير استانا» كومپانياسىنا سالىنعان شەكتەۋلەر الىنىپ تاستالدى. قازاقستاننىڭ 2010-2014 - جىلدارعا ارنالعان كولىكتىك ينفراقۇرىلىمداردى دامىتۋ باعدارلاماسى ويداعىداي جۇزەگە اسىرىلدى. ەندى بيىل وسى سالادا جاڭا مەملەكەتتىك باعدارلاما قابىلداندى» - دەدى ءوز سوزىندە زامير ساعىنوۆ.

بۇل شاراعا تەڭىزگە شىعۋ مۇمكىندىگى جوق 28 ەلدىڭ وكىلدەرى قاتىسۋدا. وتىرىس بارىسىندا الماتى ءىس- ارەكەت باعدارلاماسىن جۇزەگە اسىرۋ ماسەلەسى تالقىلاندى.

ايتا كەتەلىك، بۇل باعدارلاما 2003 - جىلى 28-29 - تامىز ارالىعىندا الماتى قالاسىندا وتكەن تەڭىزگە شىعۋ مۇمكىندىگى جوق دامۋشى ەلدەر مينيسترلەرىنىڭ حالىقارالىق كونفەرەنتسياسىندا قابىلدانعان بولاتىن.

اتالمىش باعدارلاما تەڭىزگە شىعۋ مۇمكىندىگى جوق ەلدەردىڭ «جول كارتاسى» دەسە دە بولادى. ياعني سول ەلدەرگە كومەكتەسۋگە باعىتتالعان. وندا ترانزيتتىك تاسىمالداۋ جانە كولىكتىك ينفراقۇرىلىمداردى دامىتۋ بويىنشا ناقتى شارالار مەن ۇسىنىستار  تولىعىمەن قامتىلعان.

الداعى 3-5 - قاراشا ارالىعىندا ۆەنا قالاسىندا (اۆستريا) الماتى ءىس- ارەكەت باعدارلاماسىن جۇزەگە اسىرۋعا قاتىستى حالىقارالىق مەرەيتويلىق كونفەرەنتسيا بولادى. بۇگىنگى كوشپەلى كەڭەس سوعان دايىندىق ىسپەتتەس.

كوشپەلى كەڭەس الماتىدا 16 - شىلدەگە دەيىن جالعاسادى.

اۆتور:   جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى