قازاقپارات كۇنتىزبەسى: 29- قاڭتار
اتاۋلى كۇندەر
حالىقارالىق يادرولىق سوعىس قاۋپىنە قارسى جۇمىلدىرۋ كۇنى
وسى اتاۋلى كۇن 1985-جىلى يادرولىق قارۋلانۋ جارىسىن توقتاتۋعا شاقىراتىن دەلي دەكلاراتسياسىنىڭ قابىلدانۋىنا وراي تاڭدالدى. دەكلاراتسيا ءۇندىستان استاناسىندا ءۇندىستان، ارگەنتينا، گرەكيا، مەكسيكا، تانزانيا جانە شۆەتسيا مەملەكەت جانە ۇكىمەت باسشىلارىنىڭ وتىرىسىندا قابىلداندى.
ەستە قالار وقيعالار
1992-جىلى قازاقستان رەسپۋبليكاسى مەن يران يسلام رەسپۋبليكاسى اراسىندا ديپلوماتيالىق قارىم-قاتىناس ورناتۋ تۋرالى حاتتاماعا قول قويىلدى.
1998 -جىلى «بايقوڭىر» عارىش ايلاعىنان تالعات مۇسابايەۆ باستاعان حالىقارالىق ەكيپاج عارىشقا اتتاندى. بۇل قازاق عارىشكەرى كوماندير بولعان تۇڭعىش ەكسپەديتسيا رەتىندە تاريحتا قالدى.
2010 -جىلى قازاقستاندىق ءانشى ماريا مۋدرياك يتالياداعى «Raccomandaty « تەلەۆيزيالىق كونكۋرسىنىڭ جەڭىمپازى اتاندى.
2010 -جىلى قىتاي استاناسى بەيجىڭگە العاش رەت «تۇرىكمەنستان - وزبەكستان - قازاقستان - قىتاي» گاز قۇبىرى بويىنشا ورتالىق ازيادان تابيعي گاز جەتكىزىلدى.
2014 -جىلى قازاقستاندىق رەجيسسەر ءامىر ءبايعازيننىڭ «ۇيلەسىمدىلىك ساباقتارى» كارتيناسى فرانسۋزدىڭ انجە قالاسىنداعى حالىقارالىق Premiers Plams كينوفەستيۆالىندە گران-پريدى جەڭىپ الدى.
2016 -جىلى استانا قالاسى اكىمدىگى مەن گۋستاۆ رۋسسي اتىنداعى ونكولوگيا ينستيتۋتى (فرانسيا) اراسىندا ارىپتەستىك تۋرالى مەموراندۋم اياسىندا حيميالىق پرەپاراتتار جاساۋ ورتالىعى اشىلدى.
ورتالىقتىڭ ەرەكشەلىگى - بۇنداعى ناۋقاستارعا بەرىلەتىن دالمە-ءدال ءدارى مولشەرى حالىقارالىق پروتوكولعا ساي انىقتالادى.
2017-جىلى «الماتى ارەنا» مۇز ايدىنىندا XXVIII بۇكىل الەمدىك قىسقى ۋنيۆەرسيادانىڭ اشىلۋ سالتاناتى ءوتتى. ۋنيۆەرسيادا باعدارلاماسىنا 12 قىسقى سپورت ءتۇرى ەندى.
2019 -جىلى تۇركىستانداعى كۇلتوبە قالاشىعىنىڭ سولتۇستىك بولىگىنەن XIX عاسىرعا ءتان قوقان ءۇيىنىڭ قالدىقتارى ورنى تابىلدى. ودان 70 سانتيمەتردەي تومەن تۇستا XVI- XVII عاسىرعا ءتان قازاق ءۇيدى كەزىكتىرۋگە بولادى.
مۇندا كۇلى دە سول قالپىندا ساقتالعان تاندىر، ءدالىز جانە ەسىك ورنى بار. ءتۇرلى عاسىرعا ءتان قۇمىرا سىنىقتارى دا كوپتەپ شىعا باستاعان. ءبىزدىڭ زامانىمىزعا دەيىنگى Ⅱ عاسىردان باستاۋ الاتىن قازاقستانداعى العاشقى ساۋلەت قۇرىلىستارى بار كۇلتوبە قالاشىعى ءبىرقاتار دەرەكتەردە كۇلتوبە ياسى (اسون) دەپ اتالادى.
العاش رەت ياسى اتاۋى مونعولداردىڭ ۇلى حانى مەنگۋدىڭ ورداسىنا قازاقستاننىڭ وڭتۇستىك ايماعى ارقىلى ساپار شەككەن ارميان پاتشاسى I گەتۋمنىڭ قولجازباسىندا كەزدەسەدى.
2019 -جىلى استانا IDC كومپانياسىنىڭ نۇسقاسى بويىنشا اقىلدى قالالاردىڭ حالىقارالىق رەيتينگىنە ەندى. زەرتتەۋ ناتيجەلەرى بويىنشا ەلوردانىڭ جەتىلۋ دەڭگەيى - 2.48 بالدى قۇرادى. استانا قالاسى ورتالىق ازيادا وسى ۇلگى بويىنشا زەرتتەلگەن جانە Smart City كەمەل باعاسىن العان العاشقى قالا بولدى.
2020 -جىلى الماتىدا ۇلى عالىم ءال-فارابيدىڭ 1150 جىلدىعىن مەرەكەلەۋ رەسمي تۇردە باستالدى. ق ر مەملەكەتتىك حاتشىسى قىرىمبەك كوشەربايەۆ ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتتەر سارايىندا وتكەن شارادا ءابۋ ناسىر ءال-فارابيدىڭ 1150 جىلدىعىن مەرەكەلەۋ رەسمي تۇردە باستالعانىن ايتتى.
مەملەكەتتىك حاتشى ءال-فارابيدىڭ 1150 جىلدىعىن مەرەكەلەۋ ۇلى عۇلاما مۇرالارىن جانە ءبىزدىڭ ەلدەگى، سونىمەن بىرگە شەتەلدەگى الەمدىك وركەنيەت دامۋىنا قوسقان ۇلەسىن زەردەلەۋگە قۋاتتى سەرپىن بەرەتىنىن، جاستاردىڭ ۇلتتىق ماقتانىش سەزىمىن قالىپتاستىرۋعا، سونداي-اق ولاردى عىلىمي قىزمەت سالاسىنا تارتۋعا مۇمكىندىك بەرەتىنىن اتاپ ءوتتى.
2020 -جىلى الماتىدا ءابۋ ناسىر ءال-فارابي اتىنداعى كىتاپحانا-ورتالىق اشىلدى. تۇساۋكەسەر بارىسىندا قوناقتار ۇلى ويشىلعا ارنالعان مۇراجاي ەكسپوزيتسيالارىمەن تانىستى، ونىڭ شىعارمالارى قويىلعان كورمەنى، قازاقستاننىڭ تۇڭعىش پرەزيدەنتى، اباي مەن الاش قوزعالىسىنىڭ قايراتكەرلەرىنە، سيرەك كەزدەسەتىن جانە قۇندى كىتاپتار قورىنا ارنالعان ساندىق زالدى ارالاپ كوردى.
