ەرتىس جاعاسىنداعى اسەم قالاعا - 295 جىل
شاھاردىڭ قۇرىلعانىنا - 295 جىل. وسى ۋاقىت ىشىندە پاۆلودار الەۋمەتتىك-ەكونوميكالىق تۇرعىدان دامىپ، ەلىمىزدەگى كوشباسشى قالالاردىڭ قاتارىنا ەندى.
پاۆلودار قالاسى ەلىمىزگە مەتاللۋرگيا، ماشينا جاساۋ، حيميا، مۇناي- حيميا سالالارى ارقىلى تانىمال. مۇندا ەل ەكونوميكاسىن ەسەلەپ وتىرعان الپاۋىت كاسىپورىندار ورنالاسقان. تاريحى تەرەڭدە جاتقان شاھار قازىرگى ۋاقىتتا كۇننەن- كۇنگە دامىپ كەلەدى.
جىلدان-جىلعا تۇرعىندارىنىڭ سانى ءوسىپ، جەتكەن جەتىستىكتەرى ەسەلەنۋدە. بۇگىن شاھاردىڭ قۇرىلعانىنا 295 جىل تولىپ وتىر. بۇل - بارشا پاۆلودارلىقتار ءۇشىن ايتۋلى مەرەكە. بولات باقاۋوۆ، قالا اكىمى:
- قالا كۇنى بارشامىزعا قۇتتى بولسىن! شاھارمىز جايناي بەرسىن. مارتەبەسى بيىك بولسىن! شاھاردىڭ دامۋى، ارينە، تۇرعىندارىنىڭ ارقاسىندا جۇزەگە اسۋدا. بۇگىن مەرەكە كۇنى پاۆلودار قالاسىنىڭ الەۋمەتتىك- ەكونوميكالىق دامۋىنا زور ۇلەسىن قوسىپ كەلە جاتقان تۇلعالارعا شاھاردىڭ قۇرمەتتى ازاماتى اتاعى بەرىلدى.
بۇل كۇنى ەرتىس جاعاسىندا سالتاناتتى شارا ءوتىپ، ءان مەن كۇيدەن شاشۋ شاشىلدى. ال ۇزدىك سۋرەتشىلەر جۇرتشىلىققا وزدەرىنىڭ تاڭداۋلى تۋىندىلارىن سىيعا تارتتى. پاۆلودار قالاسىنىڭ تاريحى تەرەڭدە جاتىر. شاھار 3 عاسىر ۋاقىتتى ارتتا قالدىرعان. بۇل ءوڭىر ەلىمىزگە تەك قانا وندىرىسىمەن ەمەس، مادەنيەتىمەن دە تانىمال. ايماقتا الەم تانىعان تالاي دارىندى، بەلگىلى تۇلعالار مەن عالىمدار تۇلەپ ۇشقان.
قازاقتىڭ بەلگىلى پۋبليتسيست عالىمى قاليجان بەكحوجين، جەزتاڭداي ءانشىسى مايرا ءۋالي قىزى، اتاقتى ەستاي اقىن بەركىمباي ۇلى پەن پاۆەل ۆاسيليەۆ سياقتى دارا تۇلعالار وسى پاۆلوداردان شىققان. ال قازىرگى كۇنى بابالار جولىن وسكەلەڭ ۇرپاق جالعاستىرۋدا. شاھاردا سونداي- اق سپورت سالاسى قارقىندى دامىپ كەلەدى. جاستارىمىز بايراقتى باسەكەلەردە ەل نامىسىن اسقاقتاتىپ ءجۇر. بۇگىن قالا كۇنى قارساڭىندا سالاۋاتتى ءومىر سالتىن ۇستانۋشىلارعا ارنالعان ءبىرقاتار سپورتتىق نىساندار اشىلدى.
اندرەي نەۆزوروۆ، ق ر شاڭعى سپورتى فەدەراتسياسى ق ب باس حاتشىسى:
- پاۆلوداردا اشىلىپ وتىرعان شاڭعى روللەر الاڭى تۇرعىندارعا، جاستارعا وتە كەرەك. ولار مۇندا ۋاقىتتارىن بوس وتكىزبەي، سپورتپەن شۇعىلدانادى. سونداي-اق بۇل الاڭ قالا تۇرعىندارى كوپ جينالاتىن اسەم ورىنعا اينالماق. كوركىنە كوز تامسانار ەركە ەرتىستىڭ جاعاسىنداعى پاۆلودار قالاسى، مىنە، وسىنداي. شاھار كۇننەن- كۇنگە قارىشتاپ دامىپ قانا قويماي، قازاق ەلىنىڭ مارتەبەسىن اسقاقتاتار تالاي دارىندى تۇلعالاردى وربىتەرى انىق.
www.24.kz
