29- قازان جالپىۇلتتىق ازا تۇتۋ كۇنى بولىپ جاريالاندى
قاسىم-جومارت توقايەۆ قاراعاندى وبلىسىنداعى كوستەنكو شاحتاسىندا قايعىلى وقيعا سالدارىنان قازا تاپقان كەنشىلەردىڭ وتباسىلارىمەن جانە تۋعان-تۋىستارىمەن كەزدەسىپ، كوڭىل ايتتى، دەپ حابارلايدى اقوردانىڭ باسپا ءسوز قىزمەتى.
پرەزيدەنت اپاتتىڭ ءمان-جايىن انىقتاۋ، كەنشىلەردى قۇتقارۋ جانە زارداپ شەككەندەر مەن قازا تاپقانداردىڭ وتباسىلارىنا شۇعىل كومەك كورسەتۋ جونىندە قاجەتتى شارالار قابىلداناتىنىن جەتكىزدى.
مەملەكەت باسشىسى ەرتەڭ، ياعني 29- قازاندى ەلىمىزدە جالپىۇلتتىق ازا تۇتۋ كۇنى دەپ جاريالايتىنىن ايتتى.
قاراعاندى وبلىسىنداعى كوستەنكو اتىنداعى شاحتادا بولعان ورتتەن قازا تاپقان كەنشىلەر سانى 21-گە جەتتى، 23 كەنشى ءالى دە جەر استىندا.
قازاقستان پرەزيدەنتى قاسىم-جومارت توقايەۆ قازا تاپقان كەنشىلەردىڭ تۋعان-تۋىستارى مەن جاقىندارىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىن تىلەدى.
ۇكىمەتكە كەنشىلەردىڭ وتباسىلارىنا بارلىق قاجەتتى كومەك كورسەتۋدى تاپسىردى. وقيعانىڭ ءمان-جايىن انىقتاۋ ءۇشىن ۇكىمەتتىك كوميسسيا قۇرىلدى. سونداي-اق، «ارسەلورميتتالتەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋ تاپسىرىلدى.
شاحتاداعى ءورت فاكتىسى بويىنشا قىلمىستىق كودەكستىڭ 277-بابىنىڭ 3-بولىگى «تاۋ-كەن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك قاعيدالارىن بۇزۋ» بابى بويىنشا سوتقا دەيىنگى تەرگەپ- تەكسەرۋ باستالدى.
پروفەسسور ح. ج. ماقاجانوۆ اتىنداعى اۋرۋحانالارعا 18 ادام جەتكىزىلدى. ءبىر ادام رەانيماتسيادا جاتىر.
مەملەكەت باسشىسىنىڭ تاپسىرماسىنا سايكەس پرەمەر-مينيستر ءاليحان سمايىلوۆتىڭ توراعالىعىمەن اپاتتىڭ سەبەپتەرىن تەرگەۋ جانە ونىڭ سالدارىن جويۋ جونىندەگى ۇكىمەتتىك كوميسسيا قۇرىلدى.
ونىڭ قۇرامىنا پرەمەر-ءمينيستردىڭ ءبىرىنشى ورىنباسارى رومان سكليار، توتەنشە جاعدايلار ءمينيسترى سىرىم ءشارىپحانوۆ، ىشكى ىستەر ءمينيسترى ەرجان سادەنوۆ، دەنساۋلىق ساقتاۋ ءمينيسترى اجار عينيات، ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا، ونەركاسىپ جانە قۇرىلىس ءمينيسترى قانات شارلاپايەۆ، قۇقىق قورعاۋ ورگاندارىنىڭ، قاراعاندى وبلىسى اكىمدىگىنىڭ، ەڭبەك ينسپەكتسياسىنىڭ، «قورعاۋ» كومىر وندىرۋشىلەر كاسىپوداعىنىڭ وكىلدەرى جانە ت. ب. كىردى.
سونداي-اق، ۇكىمەت «ارسەلورميتتال تەمىرتاۋ» ا ق اكتسيونەرلەرىمەن الدىن الا ۋاعدالاستىققا قول جەتكىزىلگەنىن جانە كاسىپورىننىڭ مەنشىك قۇقىعىن قازاقستان رەسپۋبليكاسىنىڭ پايداسىنا بەرۋ تۋرالى كەلىسىمشارتتى راسىمدەۋ اياقتالۋ ۇستىندە ەكەندىگىن حابارلادى.
