قازىعۇرتتا 29 جاستاعى كەلىنشەك 8 بالانىڭ اناسى اتاندى
ءارقايسىسىنىڭ سالماعى 2,5 كەلىدەن دەپ حابارلادى وڭتۇستىك قازاقستان گازەتى.
ۇشەمنىڭ اناسى قۇرالاي تاعايەۆا 29 جاسىندا سەگىز ءسابي ءسۇيىپ، كوپبالالى انا اتانىپ وتىر.
«ءۇش قىزىمنان بولەك بەس پەرزەنتىم بار. ونىڭ ەكەۋى ەگىز. ۇشەمنىڭ الدىندا ەگىز قىزدارىمدى بوسانعان بولاتىنمىن. ەندى جەتى قىز جانە ءبىر ۇلدىڭ اناسىمىن»، - دەيدى قازىعۇرتتىق قۇرالاي.
كوپبالالى انا ەگىز قىزدارى مەن ۇشەمدەرىن بوسانۋ كەزىندە ساپالى مەديتسينالىق قىزمەتىن كورسەتىپ، كومەگىن ۇسىنعان شىمكەنت قالاسىنداعى №1 پەريناتالدىق ورتالىقتىڭ باس دارىگەرى مەن مەيىربيكەلەرىنە العىس ايتتى.
وڭتۇستىك قازاقستان وبلىسى تۋۋ كورسەتكىشى بويىنشا رەسپۋبليكادا الدىڭعى ورىندا. بۇل ايماقتا ەگىزدەر مەن ۇشەمدەردىڭ دۇنيەگە كەلۋى ەرەكشە جاڭالىق ەمەس. تورتەم تۋعان انا دا - وسى وڭىردەن.
