قوستاناي وبلىسىندا 28 ايەل اكىم بار
بۇگىندە قوستاناي وبلىسىندا 884 مىڭ ادام تۇرسا، ونىڭ 52,6 پايىزى ايەلدەر. مۇنىڭ سىرتىندا وڭىردەگى مەملەكەتتىك قىزمەتكەرلەردىڭ 60 پايىزى نازىك جاندىلاردىڭ ۇلەسىندە.
«جەرگىلىكتى اتقارۋشى ورگاندارداعى 140 ايەل لاۋازىمدى جۇمىستاردى اتقارۋدا. ونىڭ ىشىندە 6 وبلىستىق باسقارمانىڭ باسشىسى، 9 قالا- اۋدان اكىمدەرىنىڭ ورىنباسارلارى، 28 اۋىلدىڭ اكىمى بار. تاعى ءبىر ايتا كەتەرلىگى، مەملەكەتتىك الەۋمەتتىك ساياسات كوپبالالى جانە از قامتىلعان وتباسىلاردى، جالعىز باستى انالاردى قولداۋعا باعىتتالعان. ماسەلەن، انا مەن بالا ورتالىعى، جاڭا پەرزەنتحانالار سالىنىپ، زاماناۋي قۇرىلعىلارمەن جابدىقتالدى. پرەزيدەنتتىڭ بيىلعى جولداۋىن ىسكە اسىرۋ اياسىندا 2018 -جىلعى 1 - شىلدەدەن باستاپ، مۇمكىندىگى شەكتەۋلى بالالاردىڭ انالارىنا ارنايى جاردەماقى تاعايىندالاتىن بولادى. مەملەكەت تاراپىنان كورسەتىلەتىن وسىنداي تۇراقتى قامقورلىقتىڭ ارقاسىندا ەلدەگى دەموگرافيالىق جاعداي تۇزەلدى»، - دەپ اتاپ ءوتتى ارحيمەد مۇحامبەتوۆ.
بىلتىر قوستانايدا ساياساتكەر ايەلدەردىڭ كلۋبى اشىلدى. كلۋب قۇرامىندا 17 ايەل جۇمىس ىستەيدى. ولاردىڭ باستى ماقساتى - مەملەكەتتىك جانە قوعامدىق- ساياسي جۇمىستارداعى ايەلدەردىڭ كادرلىق رەزەرۆىن قالىپتاستىرۋ. وسى تۇستا وبلىس باسشىسى قوستانايداعى ماقتان تۇتار تۇلعالاردىڭ ەڭبەكتەرىن «جىپكە ءتىزدى».
«ەسىمى وبلىستىڭ تاريحىنا التىن ارىپتەرمەن جازىلعان جانداردىڭ ءبىرى بۇگىن ءبىزدىڭ ورتامىزدا. ول - سوتسياليستىك ەڭبەك ەرى اليەۆتينا كۋزمينا. بۇل كىسى جاستايىنان ەڭبەككە ارالاسىپ، زور تابىستارعا قول جەتكىزدى. توبىل- تورعاي ءوڭىرىنىڭ اتاعىن الىسقا جىبەرىپ، كۇللى قازاقتى ونەرىمەن ءتانتى ەتكەن قازاقستاننىڭ حالىق اقىنى ءاسيا بەركەنوۆانى بىلمەيتىن قازاق جوق. ۇلتتىق ونەرىمىزدى ورگە سۇيرەپ كەلە جاتقان ءاسيا اپامىز وتكەن جىلى «قوستاناي وبلىسىنىڭ قۇرمەتتى ازاماتى» اتاعىنا يە بولدى. جاقىندا ا. بايتۇرسىنوۆ اتىنداعى ق م ۋ دوتسەنتى ينديرا بەيشوۆا ق ر پرەزيدەنتى قورىنىڭ سىيلىعىن الدى. وبلىستىڭ ۇزدىك مۇعالىمى جانار كوپجاسار قىزىنادا ريزاشىلىعىمىز مول. قوستانايدىڭ داڭقىن اسىرىپ، ايرىقشا تابىستارعا قول جەتكىزىپ جۇرگەن جانداردى بۇگىنگى كەشىمىزدىڭ ءقادىرلى قوناقتارى قاتارىندا كورگەنىمە قۋانىشتىمىن! بارلىقتارىڭىزدى كوكتەمنىڭ تاعى ءبىر مەرەكەسىمەن قۇتتىقتايمىن!» - دەدى وبلىس اكىمى.
بيىل ەلباسى جارلىعىمەن 3483 كوپبالالى اناعا «التىن القا» توسبەلگىسى تاپسىرىلدى. سونداي- اق، 4066 انا «كۇمىس القاعا» يە بولدى. بۇل ءتىزىمدى قوستانايلىق 35 كوپبالالى انا تولىقتىرىپ وتىر. بۇگىنگى شارادا ارحيمەد مۇحامبەتوۆ 19 كوپبالالى انانى توسبەلگىلەرمەن ماراپاتتادى.
«ەلىمىزدە كوپبالالى انالارعا دەگەن قۇرمەت شەكسىز. ءتول مەرەكەمىز قارساڭىندا وبلىس اكىمىنىڭ قولىنان ماراپات الىپ وتىرمىز. بالا تاربيەلەۋ ىسىندەگى ەڭبەگىمىزدى ەلەگەن ءاربىر جانعا انالىق ماحاباتىمىز شەكسىز»، - دەدى «التىن القا» يەگەرى ايگۇل شاياحمەتوۆا.
بەلگىلى وپەرا ءانشىسى سۇندەت بايعوجين وسى كەشكە ارنايى كەلىپ، نازىك جاندىلاردى مەرەكەلەرىمەن قۇتتىقتادى. ارى قاراي مەرەكەلىك كەش كونتسەرتتىك باعدارلاماعا ۇلاستى.
اۆتور: قاسقىرباي قويشىمانوۆ
