رەسەيدىڭ مادەنيەت ءمينيسترى 28 پانفيلوۆشىنىڭ ەرلىگىنە ءشۇبا كەلتىرگەن مۇراعات باسشىسىنا ەسكەرتۋ جاسادى

ويتكەنى، بۇل مۇلدەم بولەك ماماندىق. مۇنداي پىكىردى رەسەي مادەنيەت ءمينيسترى ۆلاديمير مەدينسكي ءبىلدىردى، دەپ جازادى «كوممەرسانت».

«رەسەيلىك مۇراعات باسشىسى - ول جازۋشى دا، جۋرناليست تە، تاريحي بۇرمالاۋشىلىقپەن كۇرەسۋشى دە ەمەس. ءبىز ەش ۋاقىتتا دا مۇراعات جۇمىسىنا ارالاسۋعا تىرىسقان جوقپىز. بۇل وڭاي شارۋا ەمەس. سوندىقتان ونى كاسىبي ماماندارعا سەنىپ تاپسىرعان ءجون. دەگەنمەن، مۇراعات قىزمەتكەرلەرى اينالىسۋى ءتيىستى ماسەلەلەر دە بار»، - دەدى ول مۇراعات ءىسى پروبلەمالارى قارالعان جيىن بارىسىندا.

ۆ. مەدينسكيدىڭ اتاپ وتۋىنشە، مۇراعات قىزمەتكەرلەرى مەملەكەت قارجى تولەگەن ىسپەن عانا اينالىسىپ، ارالاس ماماندىقتى مەڭگەرۋگە دەن قويماۋى ءتيىس. ونىڭ پايىمىنشا، مەملەكەت رەسەيلىك مۇراعاتتاردىڭ باسشىلارىنا اقشانى ادامدارعا قۇجاتتاردى ۇسىنۋ ءۇشىن تولەپ وتىر. ال ودان كەيىنگى تۇپكىلىكتى قورىتىندى شىعارۋ جۋرناليستەردىڭ ءىسى.

«ال ەگەر دە باسشىلاردىڭ ءبىرى ماماندىعىن اۋىستىرۋعا نيەت تانىتسا، ءبىز ونى تۇسىنەمىز»، - دەدى رەسەي مادەنيەت ءمينيسترى.

ايتا كەتەيىك، وسىدان ءبىراز ۋاقىت بۇرىن رەسەي مەملەكەتتىك مۇراعاتىنىڭ ديرەكتورى سەرگەي ميرونەنكو دۋبوسەكوۆو تۇبىندە 28 پانفيلوۆشىنىڭ نەمىستىڭ 50 تانكىسىنىڭ جولىن كەسكەندىگى جايلى ەرلىگىن جوققا شىعارعان ەدى. سونىمەن قاتار ول ساياسي جەتەكشى ۆاسيلي كلوچكوۆتىڭ «شەگىنەرگە جەر جوق، ارتىمىزدا موسكۆا!» دەگەن ءسوزىنىڭ دە ويدان شىعارىلعاندىعىن ايتقان بولاتىن. ونىڭ سوزىنە قاراعاندا، بۇل قاناتتى ءسوزدى «كراسنايا زۆەدا» گازەتىنىڭ ادەبي حاتشىسى الەكساندر كريۆيتسكي ويدان شىعارعان. ءدال وسى جۋرناليست 28 پانفيلوۆشىنىڭ دا ەرلىگىن جازعان ەدى.

 اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى