تالدىقورعاندا ەندى ءبىلىم ءبولىمىنىڭ باستىعى ۇستالدى. 280 ميلليون تەڭگە پارا العان
وبلىس بويىنشا انتيكوررۋپتسيالىق قىزمەت تالدىقورعان قالاسى ءبىلىم ءبولىمىنىڭ باسشىسىنا قاتىستى تەرگەۋ جۇرگىزىپ جاتىر، دەپ حابارلايدى قازاقپارات انتيكورعا سىلتەمە جاساپ.
ول ءبىلىم بولىمىندە بيۋدجەت قاراجاتىن ۇرلاۋ فاكتىلەرىن جاسىرعانى ءۇشىن قاراماعىنداعىلاردان 280 ميلليون تەڭگە پارا الدى دەگەن كۇدىككە ىلىنگەن.
سوتتىڭ سانكسياسىمەن كۇدىكتى قاماۋعا الىندى.
ءوز كەزەگىندە پارا بەرگەن ادامدار بيۋدجەت قاراجاتىن اسا ءىرى مولشەردە ۇرلاۋ تۋرالى ءىس بويىنشا نەگىزگى ايىپتالۋشى سانالادى جانە سوتتىڭ سانكسياسىمەن قاماۋدا وتىر.
سوتقا دەيىنگى تەرگەپ-تەكسەرۋ جالعاسۋدا، كۇدىكتىلەرگە قاتىستى ولاردىڭ كىناسىنىڭ دارەجەسىن ايقىنداي وتىرىپ، تۇپكىلىكتى ۇكىمدى سوت شىعاراتىن بولادى.
ق پ ك 201-بابىنا سايكەس تەرگەۋ مۇددەسى ءۇشىن وزگە اقپارات جاريالانبايدى.
سونىمەن بىرگە كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق ءىس جۇرگىزۋ كودەكسىنىڭ 19-بابىنىڭ 1-بولىگىنە سايكەس كۇدىكتىنىڭ كىنالىلىگى زاڭدى كۇشىنە ەنگەن سوت ۇكىمى شىقپايىنشا كىناسىز دەپ ەسەپتەلەدى.
ەسكە سالا كەتەيىك، بۇعان دەيىن پروكۋراتۋرا تالدىقورعاندىق ەسەپشىلەردىڭ ۇستالعانىن راستاعان ەدى.
كەيىن ميللياردتاعان تەڭگەنى ۇرلاعان تالدىقورعاندىق ەسەپشىنىڭ ىسىنە انتيكور ارالاستى.
انتيكور تالدىقورعاننىڭ ءبىلىم ءبولىمى قىزمەتكەرلەرىنىڭ سومكە-سومكە اقشامەن ۇستالعان ۆيدەوسىن جاريالادى.
