ۇلتتىق قوردان الىناتىن ترانسفەرت 280 ميلليارد تەڭگەگە ازايدى - باقىتجان ساعىنتايەۆ

 بۇل تۋرالى ق ر پارلامەنتى پالاتالارىنىڭ بىرلەسكەن وتىرىسىندا دەپۋتاتتاردىڭ ساۋالىنا جاۋاپ بەرگەن ۇكىمەت باسشىسى باقىتجان ساعىنتايەۆ ايتتى، دەپ حابارلايدى قازاقپارات ءتىلشىسى.

«مۇنايلىق ەمەس تاپشىلىقتى ودان ارى تومەندەتۋ بويىنشا مىندەت قويىلدى. ورتاشا مەرزىمدى جوسپاردا 2025 -جىلعا قاراي ءبىزدىڭ ماقسات - ونى 6 پايىزعا دەيىن جەتكىزۋ. بۇل كورسەتكىشكە قول جەتكىزەتىندىگىمىزگە سەنىمدىمىز. ءبىرىنشى كەزەكتە، اعىمداعى جىلدان باستاپ- اق ۇلتتىق قوردان كەپىلدەندىرىلگەن ترانسفەرتتى تومەندەتۋدى باستادىق. ەگەردە ءبىز جىل سايىن 2 تريلليون 880 ميلليارد تەڭگە الاتىن بولساق، اعىمداعى جىلى 280 ميلليارد تەڭگەگە تومەندەتتىك. كەلەسى جىلى 300 ميللياردقا تومەندەتەمىز. ال 2020 -جىلى ءبىز ۇلتتىق قوردان تەك قانا 2 تريلليون تەڭگە الاتىن بولامىز. ال بۇل اتالعان كورسەتكىشتى تومەندەتۋگە اكەلەدى»، - دەدى باقىتجان ساعىنتايەۆ.

ونىڭ ايتۋىنشا، ەلىمىزدىڭ ەكونوميكاسىن ءارتاراپتاندىرۋعا باعىتتالعان ۇلكەن جۇمىستار جۇرگىزىلۋى ءتيىس. بۇعان قوسا، ەلىمىزدە مەملەكەت باسشىسىنىڭ باستاماسىمەن ەكونوميكالىق ءوسىمنىڭ جاڭا مودەلى جاريا ەتىلىپ وتىر.

«وسىعان بايلانىستى اۋقىمدى جۇمىستار جۇرگىزىلىپ جاتىر. قازىرگى ۋاقىتتا فراۋنگوفەر ينستيتۋتىمەن بىرلەسىپ، بۇكىل ەلدەگى 500 ءىرى جانە ورتا كاسىپورىنداردى زەرتتەپ، ولاردىڭ 4.0 پارامەترلەرىنە دايىندىقتارىن سارالادى. بۇگىننىڭ وزىندە 14 ءىرى كومپانيانىڭ ءوز باعدارلاماسى بار. ەكونوميكانى سيفرلاندىرۋ بويىنشا دا ۇلكەن جۇمىستار جۇرگىزىلۋدە»، - دەدى ۇكىمەت باسشىسى.

پرەمەر- ءمينيستردىڭ ايتۋىنشا، ەلىمىزدىڭ جۇيە قۇراۋشى كومپانيالارى سيفرلاندىرۋ باعىتىندا جۇمىس ىستەپ جاتىر. ولار وزدەرىنىڭ باسەكەلەستىگىن، ەڭبەك ونىمدىلىگىن ارتتىرىپ، ەكسپورتقا شىعاراتىن ءونىم ۇلەسىن ارتتىرا تۇسۋدە.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى