قاڭتار وقيعاسىنا قاتىسقان 27 ادامعا ۇكىم شىعىپ، ءبارى سوت زالىندا بوساتىلدى
اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ق ر قىلمىستىق كودەكسىنىڭ 272-بابىنىڭ 2،3-بولىكتەرىمەن، 188-بابىنىڭ 1-بولىگىمەن، 191-بابىنىڭ 3-بولىگىنىڭ 3-تارماعىمەن، 200-بابىنىڭ 2-بولىگىنىڭ 1-تارماعىمەن، 200-بابىنىڭ 4-بولىگىمەن، 380-بابىنىڭ 3-بولىگىنىڭ 1،4،8-تارماقتارىمەن، 380-1-بابىنىڭ 2-بولىگىنىڭ 6-تارماعىمەن، 287-بابىنىڭ 4-بولىگىمەن، 291-بابىنىڭ 4-بولىگىنىڭ 2-تارماعىمەن، 28-بابىنىڭ 5-بولىگىمەن، 291-بابىنىڭ 4-بولىگىنىڭ 2-تارماعىمەن (2022-جىلعى 11- شىلدەدەگى وزگەرىسكە دەيىن) ايىپتالعان 27 ادامعا قاتىستى قىلمىستىق ءىس قارالدى.
«سوتتالۋشىلاردىڭ ءبىرى س. 2022-جىلعى 4- قاڭتاردا WhatsApp قوسىمشاسى ارقىلى اتىراۋ تۇرعىندارىن بيلىك وكىلدەرىنىڭ زاڭدى تالاپتارىنا بەلسەندى تۇردە باعىنباۋعا، جاپپاي تارتىپسىزدىككە شاقىرعان. ال، د. 2022-جىلعى 4- قاڭتاردا پوليتسيا قىزمەتكەرىنە كۇش قولدانعان. 2022-جىلعى 5- قاڭتاردا وبلىس اكىمدىگى عيماراتىنىڭ الدىندا سوتتالۋشىلار ا.، ا.، ب.، د.، ك.، م. ، ب.، ش.، ۋ.، گ.، د.، س.، ب.، ە.، ج.، ي.، ي. جانە ن. پوليتسيانىڭ زاڭدى تالاپتارىنا باعىنباي، ولارعا قاتىستى كۇش قولدانىپ، قۇقىق قورعاۋ ورگاندارى قىزمەتكەرلەرىنىڭ دەنساۋلىعىنا زيان كەلتىرىپ، كۇش قولدانۋمەن، قيراتۋمەن، بۇزۋمەن، مۇلىكتى جويۋمەن ۇلاسقان جاپپاي تارتىپسىزدىككە قاتىسقان. سوتتالۋشىلار ق.، س.، ح.، ب.، ن.، ت.، ت. پوليتسيا قىزمەتكەرلەرىنىڭ زاڭدى تالاپتارىنا باعىنباي، كۇش قولدانۋمەن، قيراتۋمەن، بۇزۋمەن، مۇلىكتى جويۋمەن ۇلاسقان جاپپاي تارتىپسىزدىككە قاتىسقان. سوتتالۋشىلاردىڭ كىناسى جابىرلەنۋشىلەردىڭ، كۋالاردىڭ ايعاقتارىمەن، وزدەرىنىڭ مويىنداۋ جاۋاپتارىمەن، وقيعانىڭ بارىسى تۇسىرىلگەن بەينەجازبالارمەن جانە ساراپتاما قورىتىندىسىمەن دالەلدەندى»، - دەپ حابارلادى اتالعان سوتتىڭ باسپا ءسوز قىزمەتى.
سوت تالقىلاۋى بارىسىندا سوتتالۋشىلاردىڭ ءىس-ارەكەتى اۋىر جانە اۋىرلىعى ورتاشا قىلمىستىق قۇقىق بۇزۋشىلىقتارعا بايلانىستى قايتا سارالانعان.
پروكۋرور جاڭا ايىپتاۋ اكتىسىن ۇسىنعان.
سوتتالۋشىلار ءىس بويىنشا جيناقتالعان دالەلدەمەلەردى داۋلامايتىنىن كورسەتىپ، كىنانى مويىنداۋ تۋرالى پروتسەستىك كەلىسىم جاساۋدى سۇراعان.
سوت تەرگەۋى بارىسىندا پروكۋروردىڭ، سوتتالۋشىلار مەن ولاردىڭ قورعاۋشىلارىنىڭ قاتىسۋىمەن، جابىرلەنۋشىلەردىڭ كەلىسىمىمەن كىنانى مويىنداۋ تۋرالى پروتسەستىك كەلىسىم جاسالعان.
«26 سوتتالۋشىنىڭ جازاسىن اۋىرلاتاتىن ءمان-جاي انىقتالمادى. سوتتالۋشى ي- عا ق ر قىلمىستىق كودەكسىنىڭ 55-بابىنىڭ 4-بولىگىنىڭ نورماسىن قولدانۋمەن 3 جىل مەرزىمگە باس بوستاندىعىن شەكتەۋ جازاسى تاعايىندالىپ، ونىڭ ارەكەتىندە قىلمىستىڭ قايتالانۋى تانىلدى. ال، 26 سوتتالۋشىعا قاتىستى 2022-جىلعى 2- قاراشاداعى «راقىمشىلىق جاساۋ تۋرالى» قازاقستان رەسپۋبليكاسى زاڭى قولدانىلدى. ونىڭ ىشىندە 2 سوتتالۋشى راقىمشىلىق زاڭىنا، 17 سوتتالۋشى جازاسىن وتەۋىنە بايلانىستى قىلمىستىق جاۋاپتىلىقتان بوساتىلدى. 7 سوتتالۋشىعا باس بوستاندىعىنان ايىرۋمەن بايلانىستى ەمەس جازا تاعايىندالدى. بارلىق سوتتالۋشىلار سوت زالىنان بوساتىلدى»، - دەپ ءمالىم ەتتى سوتتىڭ باسپا ءسوز قىزمەتىنەن.
سوت ۇكىمى زاڭدى كۇشىنە ەنگەن جوق.
بۇدان بۇرىن قاڭتار وقيعاسىنا قاتىسقان اتىراۋلىقتىڭ بىرىنە سوت ۇكىمى شىققانىن جازعان ەدىك.
