ەلىمىزدە سىرىم دات ۇلىنىڭ 275 جىلدىعى اتالىپ وتىلەدى
بۇل تۋرالى قادىر مىرزا ءالي اتىنداعى مادەنيەت جانە ونەر ورتالىعىندا «قازاقستاننىڭ وتكەنى سىرلى، بولاشاعى نۇرلى» دەگەن تاقىرىپتا وبلىس تاريحشىلارى باس قوسقان دوڭگەلەك ۇستەل وتىرىسىندا اۋدان اكىمى ابات شىنىبەكوۆ ءمالىم ەتتى.
ونىڭ ايتۋىنشا، الداعى جىلى قول باستاعان باتىر، كوسەم ءارى شەشەن سىرىم دات ۇلىنىڭ 275 جىلدىعى كەڭىنەن اتالىپ وتىلمەكشى. سونىمەن قاتار الاشوردانىڭ 100 جىلدىعىنا بايلانىستى شارالار ۇيىمداستىرىلادى. الاشوردانىڭ باتىس ءبولىمى قازىرگى سىرىم اۋدانىنىڭ ورتالىعى جىمپيتى اۋىلىندا ورىن تەپكەنى، ونى الاش ارىستارى، ەل «ەكى دوس» دەپ اتاپ كەتكەن جاھانشا جانە حالەل دوسمۇحامەدوۆتەر باسقارعانى بەلگىلى. وسىعان وراي تاريحشىلارمەن، زيالى قاۋىم وكىلدەرىمەن الدىن الا كەزدەسىپ، الداعى شارالار جونىندە اقىلداسىپ الۋ قاجەتتىگى تۋىنداپ وتىر.
جيىن بارىسىندا ولكەتانۋشى جايساڭ اقباي، وبلىستىق ءماسليحات حاتشىسى مالىك قۇلشار، تاريح عىلىمدارىنىڭ دوكتورى، پروفەسسور مۇرات سىدىقوۆ، تاريحشى جاڭابەك جاقسىعاليەۆ، «جايىق پرەسس» ج ش س باس ديرەكتورى جانتاس سافۋللين جانە باسقالار ءسوز الىپ، ءوز وي- پىكىرلەرىن، ۇسىنىستارىن ورتاعا سالدى.
ايتا كەتەيىك، ق ر تاۋەلسىزدىگىنىڭ 25 جىلدىعىنا وراي «بەيبىتشىلىك پەن كەلىسىمنىڭ جول كارتاسى» مەگاجوباسى اياسىندا سىرىم اۋدانىنىڭ ورال قالاسىنداعى مادەنيەت كۇندەرى وسى قادىر ورتالىعىنداعى «تاۋەلسىزدىككە تارتۋ» اتتى كورمەمەن اشىلدى. وندا اۋدان سۋرەتشىلەرى مەن قولونەر شەبەرلەرىنىڭ تۋىندىلارى قويىلدى. كورمەنىڭ اشىلۋ راسىمىندە بەلگىلى اقىن، حالىقارالىق «الاش» سىيلىعىنىڭ لاۋرەاتى اقۇشتاپ باقتىگەرەيەۆا ونەرلى ەلدىڭ ورەندەرىنە تابىس تىلەدى. اۋداننان كەلگەن ونەرپازدار ءان شىرقاپ، كۇي كۇمبىرلەتتى.
قالا كۇنى اياسىندا سىرىم اۋدانىنىڭ وكىلدەرى «بەيبىتشىلىك پەن كەلىسىمنىڭ جول كارتاسى» مەگاجوباسىنىڭ ەستافەتاسىن قالالىقتارعا سالتاناتتى جاعدايدا تابىس ەتپەكشى.
اۆتور: ەلجان ەرالى
