تۇركيا قۇراماسىنا 26 جاسىندا باس باپكەر اتانعان قازاق بالاسى تۋرالى نە بىلەمىز
اتالعان دودادا 30 ەلدىڭ سپورتشىلارى باق سىنادى، ونىڭ ىشىندە تۇركيا ۇلتتىق قۇراماسى دا بار. 2014 -جىلدان بەرى تۇركيا كومانداسىن قازاقستاندىق مامان ارتۋر سۇلتانعالييەۆ جاتتىقتىرىپ كەلەدى، - دەپ حابارلايدى Bassport.kz.
ارتۋر سۇلتانعاليەۆ شورت-ترەكتەن قازاقستان كومانداسى ساپىندا بىرنەشە جىل ونەر كورسەتكەن. كەيىن جاراقاتى سىر بەرىپ، مانسابىن اياقتايدى. ال 2014 -جىلدان كەيىن ونى تۇركيا قۇراماسى باپكەرلىك قىزمەتكە شاقىرعان.
«سوچي وليمپياداسىنان كەيىن تىزەمنەن جاراقات الدىم. تۇركيا سول جىلى شەتەلدەن باس باپكەر ىزدەگەن. ءبىز جىل سايىن جازدا تۇركيادا وقۋ-جاتتىعۋ جيىندارىن وتكىزەتىنبىز. سول كەزدەن باستاپ ولار مەنى تانىپ، زەرتتەي باستاعان. جاراقات العاننان كەيىن مەنى باس باپكەر قىزمەتىنە شاقىردى. ءسويتىپ، 2014 -جىلدىڭ تامىز ايىنان بەرى تۇرىك شورت-ترەكشىلەرىن دايىنداپ ءجۇرمىن. قازىرگى سپورتشىلار ول كەزدە شورت- ترەكپەن ەندى اينالىسا باستاعان كىشكەنتاي بالا ەدى. ارادا 8 جىل ءوتتى، قازىر سول بالالار ءوسىپ-جەتىلىپ، بۇگىنگى ناتيجەلەرگە قول جەتكىزىپ جاتىر. وسى ءۇشىن وتە ريزامىن. بۇدان دا جاقسى ناتيجەلەرگە قول جەتكىزەتىنىمىزگە سەنەمىن جانە ءقازىر وسى ءۇشىن جۇمىس ىستەپ جاتىرمىز»، - دەيدى ارتۋر.
قازىرگى تاڭدا ارتۋدىڭ شاكىرتتەرى جاقسى ناتيجە كورسەتە باستادى. ماسەلەن، بەيجىڭ وليمپياداسىندا تۇرىك سپورتشىسى تۇڭعىش رەت شورت- ترەكتەن العاشقى التىلىققا ەندى.
«بەيجىڭ وليمپياداسىندا فۋركان اكار 1000 مەترگە جۇگىرۋدەن التىنشى ورىنعا تۇراقتادى. بۇنى 80 -جىلداعى تاريحي جەتىستىك دەسەم دە بولادى. ويتكەنى تۇركيادا قىسقى سپورت كەنجەلەپ قالعان. تۇركيادان قىسقى وليمپيادا ويىندارىنا تەك 6-7 سپورتشى ليتسەنزيا الادى ەكەن. سول ءۇشىن مۇنداي ناتيجەنى ەشكىم كۇتكەن جوق. جازداعى جاقسى دايىندىق وليمپياداداعى ناتيجەگە اسەر ەتتى. تۇركيا پرەزيدەنتى رەدجەپ تايپ ەردوعاننىڭ ءوزى ءبىزدى وسى جەتىستىكپەن قۇتتىقتادى. ەندى 2026 -جىلعا دەيىن تاجىريبە جيناۋىمىز كەرەك»، - دەيدى ارتۋر.
ارتۋر سۇلتانعاليەۆ جىلىنا ءبىر رەت اتا-اناسىنا كەلىپ تۇرادى جانە ۇلىنىڭ قازاقستان اتىن شىعارعانىن قالايدى.
«2 قىزىم، 2 ۇلىم بار. سپورتقا بەيىم. وزدەرى شورت-ترەكپەن اينالىسقىلارى كەلەدى. ءبىراق تۇركيالىق باپكەرلەردىڭ بىلىكتىلىگى تومەندەۋ، سوندىقتان ولاردى ءوز قول استىمدا تاربيەلەۋدى جوسپارلاپ ءجۇرمىن. مەن جارىستا بولعاندا، تەلەديداردان كورىپ، قولداۋ كورسەتەدى. تۇركيا مەن قازاقستانعا قاتار جانكۇيەر بولادى. جارىس كورىپ وسكەندىكتەن، شورت-ترەكپەن اينالىسقىلارى كەلەدى. بىرنەشە رەت وزىممەن بىرگە مۇزعا الىپ باردىم. ۇلكەن ۇلىمنىڭ شورت-ترەكپەن اينالىسقانىن قالايمىن جانە ءوزىم ونىڭ جەكە باپكەرى بولعىم كەلەدى. حالىقارالىق جارىستاردا ءوز وتانىمىز - قازاقستاننىڭ نامىسىن قورعاعانىن قالايمىن»، - دەيدى ول.
