ءۇش مىڭنان استام ادام ۇستالدى، 26 قارۋلى قىلمىسكەردىڭ كوزى جويىلدى
ال قىزىلوردا وبلىسىندا لاڭكەستىككە قارسى وپەراتسيا جالعاسىپ جاتىر. وڭىردە توتەنشە جاعدايدىڭ قىزىل دەڭگەيى جاريالانعان. قىلمىسكەرلەر پوليتسيا، سوت، مورگ، جەدەل جاردەم عيماراتتارىن شابۋىلدادى، وبلىس اكىمدىگىنىڭ عيماراتىنا ايتارلىقتاي زاقىم كەلتىردى. 168 ادام قالا اۋرۋحانالارىنا كەلىپ، ونىڭ 77 ءسى جاتقىزىلدى. 38 ادام جانساقتاۋ بولىمىنە تۇسكەن. قايتىس بولعاندار بار. شىمكەنتتە تارتىپسىزدىكتەر كەزىندە «سەرگەك» كامەرالارى تالقاندالعان. تۇركىستان سارايى عيماراتىنا ايتارلىقتاي زاقىم كەلگەن. «مەترو» ساۋدا ورتالىعى تونالدى. قۇرىلىس كومپانياسىنىڭ اكىمشىلىك عيماراتى تالقاندالدى. كورمە ورتالىعىنىڭ ءبىر بولىگى وتقا وراندى. 4 اۆتوبۋس ورتەلىپ، جەدەل جاردەم كولىگىنە شابۋىل جاسالدى. قاراپايىم تۇرعىنداردىڭ كولىكتەرى تالقاندالدى. قازىر قالادا جەدەل شتاب قۇرىلىپ، جۇمىس ىستەپ جاتىر.
ب ق و، س ق و جانە قوستاناي وبلىسىندا تارتىپسىزدىكتەر بولعان جوق. احۋال جەرگىلىكتى بيلىكتىڭ باقىلاۋىندا. تۇركىستان وبلىسىندا ازاماتتىق بەلسەندىلەر جەرگىلىكتى بيلىككە جاردەمدەسىپ، قوعامدىق ءتارتىپتى باقىلاۋعا اتسالىسىپ جاتىر. ءوڭىردىڭ ادام كوپ ورنالاسقان اۋداندارىندا كومەندانتتىق ساعات ەنگىزىلگەن. جاعداي باقىلاۋدا. قاراعاندى وبلىسىندا 109 سەنىم شۇعىل جەلىسى ىسكە قوسىلعان. ول تاۋلىك بويى جۇمىس ىستەيدى. جاعداي تولىق جەرگىلىكتى بيلىكتىڭ باقىلاۋىندا. اقمولا وبلىسىندا احۋال تۇراقتى. قۇقىق قورعاۋ ورگاندارىنا قوعامدىق ءتارتىپتى باقىلاۋعا كومەكتەسۋ ءۇشىن حالىق دوستىعى قۇرىلىپ، جۇمىس ىستەپ جاتىر. ول «اقمولا قاۋىپسىزدىك اۋماعى» دەپ اتالادى.
اتىراۋ وبلىسى 6 قاڭتاردىڭ كەشكى ۋاقىتىنداعى جاعداي بويىنشا الاڭداعى شەرۋشىلەر ءوز ەركىمەن تارقادى. ال قالعاندارى توتەنشە جاعدايدىڭ رەجيمىن بۇزعانى ءۇشىن قاماۋعا الىندى. جالپى تارتىپسىزدىك كەزىندە 4 ءى مەن 6 سى ارالىعىندا 48 ادام دەنساۋلىق ساقتاۋ ۇيىمدارىنا جۇگىنگەن. ونىڭ ىشىندە 36 ىشكى ىستەر ورگان جانە اسكەري قىزمەتكەرلەر، 12 ءسى تۇرعىن. 5 -قاڭتارداعى تارتىپسىزدىك كەزىندە ءبىر ادامعا وق ءتيىپ، قازا تاپتى. قازىر وڭىردە احۋال تۇراقتالىپ كەلەدى.
الماتى وبلىسىندا احۋال تولىق جەرگىلىكتى بيلىكتىڭ باقىلاۋىنا الىندى. جاعدايدى قالىپقا كەلتىرۋ ءۇشىن ءتيىستى شارالار قولدانىلىپ جاتىر، لاڭكەستتىكە قارسى ايماقتىق جەدەل شتاب قۇرىلعان. بۇعان دەيىن جاپپاي تارتىپسىزدىك وبلىس ورتالىعىندا بولعان ەدى. وبلىستىق اكىمدىك عيمارات، پوليتسيا دەپارتامەنتتەرىنە شابۋىل جاسالىپ، ارنايى كولىكتەر ورتەلدى.
ساۋدا ورتالىقتارى مەن تۇرمىستىق تەحنيكا دۇكەندەرى تونالدى. تارتىپسىزدىكتەر سالدارىنا 68 ادام دارىگەرلەردىڭ كومەگىنە جۇگىنىپ، 17 ادام اۋرۋحاناعا جاتقىزىلدى. قۇقىق قورعاۋ ورگاندارىنىڭ 4 وكىلى جانساقتاۋ بولىمىندە جاتىر.
